Avropa Dərman Agentliyi gəmiricilərdən yoluxan hantavirusa qarşı Avropa İttifaqında təsdiqlənmiş bir müalicə metodunun və ya peyvəndin olmadığını açıqladı. Niderland bayrağı altında üzən "MV Hondius" adlı sərnişin gəmisində qeydə alınan yoluxma halları ilə yenidən gündəmə gələn hantavirus, səhiyyə rəsmilərini hərəkətə keçirib.

Azmedinfo.az "European Medicines Agency"nin məlumatına istinadən yazır ki, Avropa Dərman Agentliyi (European Medicines Agency - EMA) virusa qarşı hələlik klinik olaraq təsdiqlənmiş hər hansı bir antiviral müalicənin və ya peyvəndin mövcud olmadığını açıqlayıb.

MÜALİCƏ YALNIZ DƏSTƏKLƏYİCİ QULLUĞA ƏSASLANIR

EMA Mətbuat və İctimaiyyətlə Əlaqələr Departamentinin rəsmisi Yasmina Alkazar (Yasmina Alcazar) etdiyi açıqlamada, hantavirus infeksiyalarında hazırkı yanaşmanın erkən diaqnostika və dəstəkləyici qulluqdan ibarət olduğunu bildirdi. Alkazar, virusun heyvanlardan yoluxan strukturu səbəbindən peyvənd və antitellərin hazırlanması istiqamətində işlərin davam etdirildiyini, lakin bu prosesin hələ ilkin mərhələdə olduğunu ifadə etdi.

ANTİVİRAL DƏRMANLAR ÜÇÜN KAFİ MƏLUMAT YOXDUR

Rəsmi şəxs öz açıqlamasında qeyd etdi ki, bəzi antiviral dərmanlar fərqli xəstəliklərdə istifadə olunsa da, onların hantavirusa qarşı effektivliyini sübut edən kifayət qədər klinik məlumat yoxdur. Xüsusilə COVID-19 dövründə istifadə edilən "Favipiravir" kimi dərmanların bu virusa qarşı tövsiyə olunmadığı, hər bir dərmanın laboratoriya və klinik mərhələlərdən keçmədən istifadə edilməməsi gərəkdiyi vurğulandı.

PEYVƏND VƏ MÜALİCƏ İLƏ BAĞLI İŞLƏR DAVAM EDİR

EMA Fövqəladə Hallar üzrə İşçi Qrupu (Emergency Task Force) vasitəsilə hantavirusa qarşı peyvənd və müalicə üsullarının hazırlanması işlərinə dəstək verməyə hazır olduğunu bəyan etdi. Qurum xüsusilə gəmiricilər vasitəsilə ötürülən Bunyaviricetes sinfinə aid viruslara qarşı araşdırmalar aparan əczaçılıq şirkətlərinin izlənildiyini və tənzimləmə proseslərinin sürətləndirilə biləcəyini bildirdi.