ABŞ-nin Daxili Təhlükəsizlik Naziri Markveyn Mallin cümə axşamı bildirib ki, Tramp administrasiyası hamiləliyin son mərhələsində olan qadınların ABŞ-a daxil olmasının qarşısını almağa yönəlmiş mümkün məhdudiyyətlər üzərində işləyir. O, bu təşəbbüsü "doğuş turizmi" adlandırılan hala qarşı daha genişmiqyaslı mübarizə tədbirlərinin bir hissəsi kimi xarakterizə edib.

Azmedinfo.az "Newsweek"ə istinadən yazır ki, bu təklif, administrasiyanın xarici vətəndaşların uşaqlarına vətəndaşlıq qazandırmaq məqsədilə ABŞ-a gəlib doğuş etmələrinin qarşısını almaq üçün indiyə qədər atdığı ən birbaşa addımlardan birini təşkil edəcək. Bu məsələ Prezident Donald Trampın doğum hüququ ilə verilən vətəndaşlığı məhdudlaşdırmaq istiqamətindəki daha geniş təşəbbüsü ilə yanaşı əsas diqqət mərkəzinə çevrilib.

"Fox News"a danışan M.Mallin qeyd edib ki, o, üçüncü trimestrdə olan qadınların ölkəyə daxil olmasının qarşısını alacaq yeni qaydaları ən yaxşı şəkildə necə tətbiq etməyi müəyyənləşdirmək üçün Ədliyyə Nazirliyi (DOJ) və Səhiyyə və İnsan Xidmətləri Nazirliyi (HHS) ilə birgə çalışır.

"Xəstəliyin yayıla biləcəyi bir ərazidən gələn xəstə şəxslərin bura daxil olmasına icazə vermirik," deyə Mallin bildirib. "Nəvəm bu yaxınlarda dünyaya gəldi və gəlinimin mama-ginekoloqu onun üçüncü trimestrin sonlarında uçmasını istəmirdi. Ona görə də bəlkə buna baxmalıyıq — onlar hamiləliklərinin son dövrlərində bura gəlməməlidirlər, çünki düşünürəm ki, bu yolla doğum hüququ ilə vətəndaşlıq verilməsini azalda bilərik."

Daxili Təhlükəsizlik Nazirliyinin (DHS) sözçüsü qeyd edib ki, ABŞ-da doğuş etmək qanunazidd olmasa da, nazirlik viza fırıldaqçılığı da daxil olmaqla federal qanunların mümkün pozuntularının aradan qaldırılmasına köklənib.

"DHS siyasət gərəyi xüsusi istintaq metodları, davam edən təhqiqatlar və ya gələcəkdə atıla biləcək addımlar barədə şərh vermir," deyə sözçü bildirib. "Biz transmilli cinayət fəaliyyətinin mövcud olduğu yerləri müəyyən etmək və ona qarşı tədbir görmək üçün tərəfdaşlarımızla işləməyə sadiq qalırıq."