Türkiyə daxilində fəaliyyət göstərən 56 Səyahət Sağlamlıq Mərkəzində səyahətdən əvvəl ziyarət ediləcək ölkənin sağlamlıq riskləri və peyvənd tələbləri kimi mövzularda fərdi məsləhət xidmətləri göstərilir.

Azmedinfo.az "TRT Haber"ə istinadən yazır ki, Səhiyyə Nazirliyindən verilən açıqlamaya görə, Türkiyə Sərhədləri və Sahilləri Səhiyyə Ümumi Müdirliyi tərəfindən həyata keçirilən səyahət sağlamlıq xidməti təkcə Türkiyə vətəndaşlarına deyil, Türkiyədəki xarici ölkə vətəndaşlarına da təklif olunur.

Türkiyə vətəndaşlarına pulsuz təqdim edilən səyahət sağlamlıq xidmətləri, xarici ölkə vətəndaşlarına müəyyən bir ödəniş qarşılığında verilir. Səyahət sağlamlığı xidmətləri Ümumdünya Səhiyyə Təşkilatının (ÜST) Beynəlxalq Səhiyyə Qaydaları (IHR-2005) çərçivəsində səlahiyyətli mərkəzlər vasitəsilə həyata keçirilir.

Türkiyə daxilində fəaliyyət göstərən 56 Səyahət Sağlamlıq Mərkəzində ziyarət ediləcək ölkənin sağlamlıq riskləri, peyvənd tələbləri, malyariya kimi endemik xəstəliklərdən dərmanla qorunma (kimyaprofilaktika), gigiyena tədbirləri və sağlamlıq çantasının hazırlanması kimi mövzularda fərdi məsləhət xidmətləri verilir.

Səyahət Sağlamlıq Mərkəzlərindən alına biləcək xidmətlər, mərkəzlərə nə vaxt və necə müraciət etmək barədə ətraflı məlumat və mərkəzlərin əlaqə məlumatlarını “Travel Health” internet saytının “Mərkəzlərimiz” bölməsində öyrənmək olar.

Səyahət sağlamlığı ilə bağlı ətraflı məlumatı həftənin 7 günü, günün 24 saatı, Türkiyə Səhiyyə Nazirliyinin Sərhədlər və Sahillər üzrə Səhiyyə Ümumi Müdirliyinin Səyahət Sağlamlığı Məsləhət Xətti, 444 77 34 (444 SSDH) və www.seyahatsagligi.gov.tr internet saytından əldə etmək olar.