VTB MDB və digər dövlətlərdən Rusiyada müalicə olunması üçün yeni layihəyə start verib. Layihənin həyata keçirilməsini “VTB Səhiyyə” təşkil edəcək və pasiyentlərə tibbi xidmətlərin tam dövrünü əhatə edən kompleks dəstək göstərəcək: həkim və klinikaların seçilməsindən tutmuş nəqliyyat və yaşayış məsələlərinin həllinə qədər. Bankın qiymətləndirməsinə görə, bu layihənin potensial auditoriyası hər il ən azı 1 milyon nəfər təşkil edə bilər.

Azmedinfo.az xəbər verir ki, “VTB Səhiyyə” klinika seçimi, qiymət hesablaması, qəbul üçün qeydiyyat, sənədlərin tərcüməsi, sığorta və klinikada pasiyentin müşayiət olunması daxil olmaqla, geniş spektrli xidmətlər təklif edəcək.

İyunun sonunadək pilot layihəyə ilk partnyor klinikalar – həm özəl şəbəkələr, həm də ödənişli əsaslarla fəaliyyət göstərən dövlət müəssisələri – qoşulacaq. Tibbi müəssisənin seçilməsi üçün ilkin müraciətləri “VTB Səhiyyə”nin rəsmi saytı və Rusiya Səhiyyə Nazirliyinin dəstəyi ilə yaradılmış Russiamedtravel.ru informasiya portalı vasitəsilə etmək mümkün olacaq.

VTB-nin prezidentinin müavini – idarə heyəti sədrinin birinci müavini Georgi Qorşkov bildirib: “Rusiya həkimləri uzun illərdir ki, dünya miqyasında tanınmış mütəxəssislərdir və buna görə də xaricdən gələn pasiyentlərin sayı artmaqdadır. Tibbi turizm iqtisadiyyatın mühüm sahəsidir və biz bu sahəni fəal şəkildə dəstəkləməyə hazırıq. Məhz buna görə də yeni şirkət – “VTB Səhiyyə”ni yaratmışıq. Biz ölkənin bütün regionlarında fəaliyyət göstəririk, sosial müdafiə sahəsində geniş partnyor şəbəkəmiz var, eyni zamanda beynəlxalq ödənişlərin həyata keçirilməsini öz üzərimizə götürürük ki, bu da bu gün xarici vətəndaşlar üçün əsas maneələrdən biridir. Əminəm ki, bu layihə Rusiyada tibbi turizmin əsas drayverinə çevriləcək.”

“Biz MDB ölkələrində apardığımız tədqiqatlar nəticəsində müəyyən etdik ki, insanların yüksək keyfiyyətli və operativ tibbi xidmətlərə böyük ehtiyacı var, lakin yerli səhiyyə bu tələbatı tam ödəyə bilmir. MDB vətəndaşlarının 90%-i Rusiyanın tibbinə etibar etdiyini bildirib. Məhz bu səbəbdən Qazaxıstan, Özbəkistan, Tacikistan, Belarus, Azərbaycan və digər ölkələrin vətəndaşlarına müraciət anından müalicə nəticəsinin əldə edilməsinə qədər tam dəstək təklif edirik,” – deyə “VTB Səhiyyə”nin baş direktoru Sergey Neçayev bildirib.

Hər il 1 milyondan çox MDB vətəndaşı Rusiyada tibbi yardım alır. Analitik şirkət IQVIA-nın məlumatına görə, bu rəqəmin təxminən 130 min nəfəri sırf tibbi turizm məqsədilə Rusiyaya gələn pasiyentlərdir və onların orta xərci (əmək miqrantları nəzərə almadan) təxminən 630 ABŞ dolları təşkil edir. “VTB Səhiyyə”nin qiymətləndirməsinə əsasən, 2030-cu ilə qədər MDB ölkələrindən Rusiyaya tibbi turizm bazarının həcmi pasiyentlərin sayına görə iki dəfə, əsas sahələr üzrə isə (neyrocərrahiyyə, oftalmologiya, ümumi cərrahiyyə, travmatologiya və ortopediya, kardiologiya və damar cərrahiyyəsi) pul ifadəsində 3 dəfədən çox arta bilər.