“Ozempic” və “Mounjaro” kimi ticarət adları ilə tanınan GLP‑1 sinfinə aid dərmanlar təkcə çəki azaltmaqla kifayətlənmir, həm də artıq çəkili insanlarda astma simptomlarını yüngülləşdirə bilər. Bu qənaətə Aberdin Universiteti və Sinqapurun Müşahidə və Praqmatik Tədqiqatlar İnstitutunun (OPRI) alimləri gəliblər. Onlar 60 000-dən çox xəstənin məlumatlarını təhlil ediblər.

Azmedinfo.az xəbər verir ki, tədqiqatın nəticələri “Advances in Therapy” jurnalında dərc olunub.

Alimlər bir il ərzində GLP‑1 preparatlarını qəbul edən pasiyentlərlə qəbul etməyənləri müqayisə ediblər. Məlum olub ki, bu preparatları qəbul edənlərdə astmanı nəzarətdə saxlamaq üçün təyin olunan steroidlərin və digər dərmanların istifadəsi azalıb. Üstəlik, bu müsbət təsirlər cəmi 0,9 kiloqramlıq çəki itkisi ilə müşahidə olunub.

Bu effektin mexanizmi GLP‑1-in iltihab əleyhinə təsiri ilə izah olunur. Bu təsir steroid preparatlardan fərqli şəkildə baş verir və xüsusilə standart müalicəyə zəif reaksiya verən artıq çəkili astma xəstələri üçün əhəmiyyətlidir.

Tədqiqat müəllifləri hesab edirlər ki, GLP‑1 sinfinə aid preparatlar gələcəkdə tənəffüs yolları xəstəliklərinin müalicəsində perspektivli vasitə kimi qiymətləndirilə bilər. Yeni klinik tədqiqatlar bu dərmanların astma terapiyasındakı effektivliyini daha dəqiq müəyyənləşdirəcək.