ABŞ-ın Qida və Dərman Vasitələrinə Nəzarət İdarəsi (FDA), 2-ci tip diabetdən əziyyət çəkən böyüklər üçün nəzərdə tutulmuş "Awiqli" (İnsulin icodec) preparatını rəsmən təsdiqləyib. Bu yeni dərman vasitəsi xəstələrə hər gün deyil, həftədə cəmi bir dəfə inyeksiya olunmaqla qan şəkərinə nəzarət etmək imkanı qazandırır.

Azmedinfo.az "Pharmasy Times"ın məlumatına istinadən yazır ki, genişmiqyaslı kliniki sınaqlara əsasən həftəlik insulin qanda şəkərin uzunmüddətli göstəricisi olan HbA1c səviyyəsini aşağı salmaqda gündəlik insulinlərdən daha effektiv nəticə verir. Xüsusi "FlexTouch" cihazı ilə vurulan bu inyeksiya, xəstələrin gündəlik iynə vurma yükünü azaldaraq onların həyat keyfiyyətini əhəmiyyətli dərəcədə artırır.

Tədqiqat müddətində xəstələrin çəkisi və acqarına şəkər səviyyəsi sabit qalsa da, bəzi hallarda şəkərin həddindən artıq düşməsi (hipoqlikemiya) halları gündəlik insulinlə müqayisədə bir qədər yüksək müşahidə olunmuşdur. Bununla belə, preparatın ümumi təhlükəsizlik profili qəbul edilən səviyyədədir və o, insulin müalicəsində yeni, daha rahat bir dövrün başlanğıcı hesab olunur.