ABŞ-ın Harvard Universitetinin Viss İnstitutundan olan tədqiqatçılar koronavirusun insan hüceyrələrinə daxil olmasının qarşısını ala bilən yeni antivirus preparatı hazırlayıblar.

Azmedinfo.az xəbər verir ki bu barədə "Frontiers in Molecular Biosciences" məlumat yayıb. Yeni dərman virusun tez-tez mutasiyaya uğrayan xarici hissələrinə deyil, hüceyrə ilə birləşməsinə cavabdeh olan və daha stabil daxili elementinə təsir edir.

COVID-19 pandemiyasının qlobal miqyas aldığı 2020-ci ildən işə başlayan alimlər, animasiya sənayesində istifadə olunan kompüter modelləşdirmə texnologiyalarından istifadə edərək virusu bloklayan molekulları aşkar ediblər. İlkin mərhələdə diqqətə çarpan bemsentinib adlı mövcud preparat hüceyrələrə virusun daxil olmasını məhdudlaşdırsa da, effektivliyi məhdud idi.

Viss İnstitutunun mütəxəssisləri bemsentinibin strukturunu optimallaşdıraraq yeni nəsil WYS-694 adlı preparat yaradıblar. Laboratoriya testlərində WYS-694 SARS-CoV-2-yə qarşı əhəmiyyətli dərəcədə yüksək aktivlik göstərib. Maraqlıdır ki, bu dərman SARS və MERS koronaviruslarına qarşı da təsirli olub.

Laboratoriya siçanları üzərində aparılan təcrübələrdə dərman, infeksiyadan əvvəl tətbiq edildikdə, orqanizmdəki virus yükünü dörd dəfə azalda bilib. Müxtəlif molekul variantlarının effektivliyinin müqayisəsi də aparılıb. Bemsentinib orta təsir göstərdiyi halda, WYS-633 ona bərabər aktivlik nümayiş etdirib, WYS-694 isə WYS-633-dən 12,5 dəfə güclü olub.

Alimlər qeyd edirlər ki, ümidverici nəticələrə baxmayaraq, WYS-694-ün təsir mexanizmi hələ tam öyrənilməyib. Dərmanın virus zülalının hədəf hissəsi ilə necə bağlandığını müəyyən etmək üçün rentgen struktur analizi və ya kriyoelektron mikroskopiya kimi əlavə araşdırmalar tələb olunur.

Buna baxmayaraq, WYS-694 koronavirus infeksiyalarının profilaktikası və müalicəsi sahəsində əhəmiyyətli irəliləyiş ola bilər. Həblər şəklində təqdim edilməsi dərmanı xüsusilə simptomlar yaranmazdan əvvəl, kütləvi tətbiq üçün əlverişli edir.