Həkim məsləhəti olmadan antibiotik istifadəsi bu gün bütün dünyada insan sağlamlığına ciddi təhdid yaradan problemlərdən biridir. Antibiotiklər bakterial infeksiyaların müalicəsində mühüm rol oynasa da, onların düzgün və məsuliyyətli şəkildə istifadəsi son dərəcə vacibdir. Təəssüf ki, bir çox insanlar sadəcə əlamətləri əsas götürərək, dost-tanış tövsiyəsinə qulaq asaraq və ya əvvəlki reseptləri təkrar istifadə edərək antibiotik qəbul edirlər.

Azmedinfo.az xəbər verir ki, bu cür nəzarətsiz yanaşma nəticəsində orqanizmdə antibiotiklərə qarşı davamlılıq (rezistentlik) inkişaf edir və bu da gələcəkdə ən sadə infeksiyaların belə müalicəsini çətinləşdirə bilər.

Antibiotik yalnız həkim tərəfindən təyin edildiyi halda qəbul edilməlidir. Müalicənin dozası və müddəti həkim tərəfindən dəqiq müəyyənləşdirilir və bu qaydalara tam əməl olunmalıdır. Müalicəni yarımçıq saxlamaq, dozaları artırmaq və ya azaltmaq həm effektsiz nəticələrə səbəb ola bilər, həm də ciddi fəsadlara yol aça bilər. Unutmayaq ki, antibiotiklər viruslara qarşı təsirsizdir və hər öskürək, hər burun axması antibiotiklə müalicə olunmalı deyil.

Sağlam gələcək naminə – antibiotikləri yalnız həkim təyinatı ilə istifadə edin!