Akademik: Gələcəkdə tərəvəzlər dərmanların yerini tuta bilər

Tərəvəz və meyvə bitkiləri gələcəkdə dərman preparatlarını əvəz edə bilər.

Azmedinfo.az xəbər verir ki, bu fikri Rusiya Elmlər Akademiyasının akademiki, Federal Tərəvəzçilik Elmi-Tədqiqat Mərkəzinin direktoru Aleksey Soldatenko “Komsomolskaya pravda” radiosunun “Elm vaxtı” proqramında səsləndirib.

Alimin sözlərinə görə, müasir tendensiya insanların gündəlik tonusunu yüksəltmək və ömür müddətini artırmaq üçün fərdiləşdirilmiş qida məhsullarının yaradılmasına yönəlib. Seleksiyaçıların əsas vəzifəsi əvvəllər olduğu kimi, bu gün də məhsuldarlığı yüksək, xəstəliklərə və zərərli amillərə qarşı davamlı sort və hibridlərin yetişdirilməsidir. Alim qeyd edib ki, bu gün seleksiya işi daha maraqlı və səmərəli olub, çünki klassik üsullara biotexnologiya, molekulyar biologiya və genetikanın nailiyyətləri əlavə edilib. Bu isə konkret xüsusiyyətlərə malik orqanizmlər yaratmağa imkan verir.

“Bizim mərkəzdə yeni bir istiqamət fəaliyyət göstərir – tərəvəzlər təkcə qida deyil, həm də dərmandır. Biz antioksidantlar, vitaminlər və digər həyati vacib maddələrin miqdarı artırılmış yeni sort və hibridlər yaradırıq. Bu maddələri biz ya qidada kifayət qədər qəbul etmirik, ya da bioloji fəallığa malik əlavələr və dərman vasitələri ilə kompensasiya etməyə çalışırıq. Gələcəkdə isə tərəvəz və meyvə bitkiləri dərmanların yerini tutmalıdır,” – deyə akademik “Komsomolskaya pravda” radiosuna müsahibəsində bildirib.

Alim qeyd edib ki, mərkəzin əsas işi yeni sort və hibridlərin yaradılmasına yönəlib. Buna yaxın növ bitkilərin, məsələn, baş soğanın seleksiyası da daxildir – məqsəd onun davamlılığını artırmaqdır. Dərmanların tərəvəzlərlə əvəz olunması ehtimalı ilə bağlı suala cavab verən akademik bildirib ki, bu mümkündür, lakin düzgün qida seçimi üçün insanın genetikası və bağırsaq mikrobiotası barədə dərin biliyə ehtiyac var. O, sağlam və uzun ömrü ciddi bir hədəf adlandırıb.

Eyni zamanda, akademik bu gün insanların orqanizmin normal fəaliyyəti üçün zəruri olan minimal gündəlik tərəvəz normasını belə qəbul etmədiyini, daha çox ət və süd məhsullarına üstünlük verdiyini və bu problemin aradan qaldırılmasının vacibliyini vurğulayıb.