Əzələ-invaziv sidik kisəsi xərçəngi olan xəstələrin təxminən dörddə biri müalicə oluna bilər və mövcud standart kimyaterapiyadan faydalana bilər.

Azmedinfo.az xəbər verir ki, ABŞ-nin Beylor Tibb Kollecinin tədqiqatçıları bəzi şişlərin kimyaterapiyaya qarşı möhkəm müqavimət gücünün olmasının səbəblərini ayırd etmək və bu xərçəng növləri üçün daha təsirli müalicə üsullarının müəyyənləşdirmək məqsədilə, əzələ-invaziv sidik kisəsi xərçəngi şişlərinin ətraflı molekulyar analizini aparıblar.

Tədqiqat barədə məlumat verən Beylor Tibb Kollecinin laboratoriya müdiri Metyu V.Holt "məqsədlərimizdən biri xəstələrin şişlərində molekulyar markerləri müəyyən etmək idi ki, bu da bizə kimyaterapiyadan hansı pasiyentlərin daha çox faydalandığını, hansıların isə ümumiyyətlə müsbət nəticə ala bilmədiyini dəqiqləşdirməyə kömək edəcək" – deyə diqqətə çatdırıb.

Tədqiqatçılar genomika, transkriptomika, proteomika və fosfoproteinləri əhatə edən hərtərəfli inteqrasiya olunmuş multi-omik yanaşmadan istifadə edərək 60 əzələ-invaziv sidik kisəsi xərçəngi şiş nümunəsini araşdırıblar. Onlar zülal izoformlarını, yəni fərqli davrana bilən eyni zülalın bir qədər fərqli formalarını öyrəniblər.

Əldə olunan irihəcmli verilənlər riyazi hesablama proqramlarının köməyilə təhlil edilərək hər bir şiş nümunəsi üçün molekulyar profil yaradılıb. Müəyyən olunub ki, bəzi izoformlar, xüsusən də ATAD1 və RAF ailəsi kimi zülallar, kimyaterapiyaya müsbət cavab verən şişlərdə daha çox rast gəlinir. Həmin izoformları yalnız genlərə və ya RNT-yə baxmaqla müəyyən etmək mümkün deyildi. Bu, zülalları birbaşa öyrənməyin vacibliyini vurğulayır.

Tədqiqatçılar, həmçinin müalicədən əvvəl və sonra nümunələri olan xəstələrin molekulyar profillərini müqayisə edərkən müəyyən dəyişikliklər aşkarlayıblar. Kimyaterapiyadan sonra bəzi şişlər öz alt tiplərini dəyişiblər.

Bu araşdırma spesifik zülalları, müalicəyə qarşı müqavimət yollarını, habelə rezistent şişlər üçün yeni müalicə üsullarını müəyyənləşdirib. Əldə edilən yeni tədqiqatın əhəmiyyətindən danışan müəlliflər vurğulayıblar ki, nəticələr effektiv müalicəyə uyğunlaşan populyasiyanın genişləndirilməsinə, eyni zamanda ümumi müalicə nəticələrini yaxşılaşdırmağa kömək edən vacib məlumatlar verir.