Cənubi Kaliforniya Universitetinin yeni araşdırmasına görə, spirtli içkidən çox istifadə edən amerikalıların ciddi qaraciyər xəstəliyinə tutulma riski 20 il bundan əvvəl olduğundan iki dəfədən artıqdır.

Azmedinfo.az xəbər verir ki, amerikalı alimlərin bu yeni tədqiqatı spirtli içki istifadəçilərinin demoqrafik göstəricilərinə diqqət çəkib. Belə ki, adı göstərilən dörd qrup 20 il əvvəlkindən daha çox alkoqol istifadə edən şəxslərin payına düşür:

1) qadınlar;

2) yaşı 45 və daha çox olan şəxslər;

3) yoxsullar;

4) metabolik sindromu – ürəyin işemik xəstəliyi, diabet və insult riskini artıran xəstəliklər qrupu olan insanlar.

Daha əvvəl aparılan tədqiqatlar adıçəkilən qruplara aid şəxslərin alkoqol səbəbindən qaraciyər xəstəliklərinə düçar olmaq riski daşıdıqlarını göstəriblər.

Amerikalı hepatoloq və qaraciyər transplantasiyası üzrə mütəxəssis Brayan Pey Lim Linin sözlərinə görə, alkoqol səbəbindən yaranan xəstəliklər qaraciyərlə bağlı insan ölümünün əsas səbəbidir. Bu öz növbəsində, spirtli içkilərin istehlakının zəmin yaratdığı təhlükələr haqqında ciddi xəbərdarlıq əlamətidir. "Əldə edilən tədqiqat nəticələri 1990-cı illərdən bəri ağır alkoqol istehlakının demoqrafik göstəricilərinə və onun qaraciyər xəstəlikləri ilə əlaqəsinə dair ilk genişmiqyaslı təhlildir. Bu nəticələr son illərdə qaraciyər xəstəliklərinin artmasının səbəblərini müfəssəl izah edir" – deyə, Brayan Lim Li vurğulayıb.

Bundan əlavə, araşdırma Amerikada alkoqol istehlakının orta səviyyəsinin COVID-19 pandemiyasından əvvəl son 20 il ərzində dəyişməz qaldığını müəyyənləşdirib. Beləliklə təxmin etmək olar ki, postpandemiya dövründə dəyişən sağlamlıq vəziyyəti və demoqrafik xüsusiyyətlər və s. kimi alkoqol istehlakı ilə əlaqəsi olmayan amillər qaraciyər xəstəliklərinin artmasına zəmin yarada bilər.

Adıçəkilən tədqiqatın müəllifləri əmindirlər ki, əldə olunan nəticələr xəstələrin daha effektiv müalicəsi üçün həkimlərə lazımi yeniləmələri təqdim edəcək. Həmçinin yüksək risk qrupuna daxil olan pasiyentlərə göstərilən müayinə və müalicə xidmətinin miqyasının və istiqamətlərinin genişlənməsinə zəmin yaradacaq.