Alimlər xəbərdarlıq edirlər ki, qida rasionumuz gələcəkdə düçar olacağımız xroniki xəstəliklərin sayını müəyyənləşdirir.

Azmedinfo.az son isveçli alimlərin apardığı tədqiqata istinadla xəbər verir ki, sağlam qidalanma, məsələn, bitki, balıq, doymamış yağlarla zəngin olan Aralıq dənizi pəhrizi yaşlılarda demensiya və s. kimi xroniki xəstəliklərin inkişafını ləngidə bilər. Emal olunmuş ət və şəkərlə zəngin iltihablı pəhrizlər tamamilə əksinə, bu xəstəliklərin inkişafını sürətləndirə bilər.

İsveçin Karolinska İnstitutunun tədqiqatçıları dörd pəhrizə istinad edərək qida rasionunun yaşlı insanlarda xroniki xəstəliklərə necə təsir etdiyini araşdırıblar.

Tədqiq olunan pəhrizlərdən üçü özündə tərəvəzləri, meyvələri, tam taxılları, qoz-fındıq və paxlalıları, doymamış yağları ehtiva edən sağlam qidalanma rasionu olub. Bu pəhrizlər şirniyyatın, qırmızı ətin, emal olunmuş ət məhsullarının və yağ/marqarin istehlakının azaldılmasına meyl edir.

Dördüncü pəhriz, isə qırmızı ətdən, emal edilmiş ət və taxıl məhsullarından, şəkərli içkilərdən ibarət olan, tərəvəz, çay və qəhvənin daha az qəbul edildiyi iltihablı rasiondan ibarət olub.

Tədqiqatçılar 15 il ərzində İsveçdə yaşı 60 və daha yuxarı olan 2400 şəxsin qida rasionunu və onların xroniki xəstəliklərini izləyiblər.

Araşdırma qida qəbulu tezliyini, dörd pəhriz nümunəsinə riayət edilib-edilməməsinin öyrənilməsinə, həmçinin dörd modelə – empirik, pəhriz, iltihab indeksi, alternativ Aralıq dənizi pəhrizi uyğunluq modelinə əsaslanan sorğu əsasında aparılıb.

Multimorbidlik xroniki xəstəliklərin sayı kimi müəyyən edilib və orqan sistemləri – dayaq-hərəkət, ürək-damar və sinir sistemi xəstəlikləri üzrə qruplaşdırılıb.

Tədqiqatın nəticələri göstərir ki, sağlam qidalanmaya üstünlük verən şəxslərdə ürək-damar xəstəlikləri və demensiya kimi xroniki xəstəliklər çox ləng inkişaf edir. Pəhrizin qoruyucu təsiri qocalma ilə əlaqəli xəstəliklərin əsas səbəbi olan iltihabın azalması ilə izah edilə bilər.