PolyActiva-nın yeni intrakameral bioloji parçalana bilən mikroimplantın kliniki qiymətləndirilməsi üçün sınaqlarda könüllü iştirak edəcək pasiyent ABŞ vətəndaşıdır. Yeni PA5108 mikroimplant ilkin açıq bucaqlı qlaukoma və göz hipertenziyası olan xəstələrdə gözdaxili təzyiqin davamlı şəkildə azaldılmasını təmin edir.

Azmedinfo.az xarici mediaya istinadla xəbər verir ki, PA5108 yeni kimyəvi maddədir və latanoprost turşusunun ön dərmanıdır. O, ambulator şəraitdə birdəfəlik inyeksiyadan sonra altı ay ərzində ardıcıl gözdaxili təzyiqin aşağı salınması terapiyasını təmin etmək üçün nəzərdə tutulub.

Birbaşa gözün ön kamerasına yerləşdirilən çubuq implantı PolyActiva-nın patentli PREZIA texnologiya platformasını özündə birləşdirir.

Yeni nəsil mikroimplantın üstünlüklərindən bəhs edən PolyActiva-nın baş direktoru Cerri Piter "gözdaxili təzyiqin uzunmüddətli, dayanıqlı nəzarətini təmin etmək üçün uzun müddət fəaliyyət göstərən, bioloji parçalana bilən implant təklif etməklə müalicə paradiqmasında inqilab etməyi hədəfləyirik" – deyə, diqqətə çatdırıb. Onun sözlərinə görə, intrakameral bioloji parçalana bilən mikroimplantın "1a fazası" adlı ilk sınaqları Avstraliyada keçirilib və gözlənilən nəticələr kliniki qiymətləndirilmədə öz təsdiqini tapıb.