Sidney Universitetinin alimlərinin apardığı son araşdırma göstərib ki, sağlamlığın nəzərəçarpacaq dərəcədə yaxşılaşması üçün gündə cəmi 7000 addım atmaq kifayətdir. Bu nəticə, uzun illər ərzində geniş yayılan “gündə 10 min addım” tövsiyəsinin yenidən nəzərdən keçirilməsinə səbəb olub.

Azmedinfo.az bu barədə "ABC News"a istinadən xəbər verir ki, tədqiqat çərçivəsində 57 fərqli araşdırmadan 160 mindən çox yetkin insanın məlumatları təhlil edilib. Nəticələr göstərib ki, 7000 addım ürək-damar xəstəlikləri, 2-ci tip şəkərli diabet, demensiya və bəzi onkoloji xəstəliklər kimi ciddi problemlərin yaranma riskini xeyli azaldır.

Alimlər bu hədəfin əksər insanlar üçün daha real və əldə edilə bilən olduğunu bildirirlər. Maraqlıdır ki, 7000 addım səviyyəsinə çatdıqdan sonra əlavə addımların sağlamlığa təsiri azalır. Məsələn, 7000 və 10.000 addım atan insanlar arasında ölüm riski baxımından ciddi fərq yoxdur. Lakin bəzi hallarda – məsələn, şəkərli diabet və demensiya kimi xəstəliklərdə – fiziki aktivliyin az da olsa artırılması əlavə fayda verə bilər.

Hətta gündə sadəcə 4000 addım atmaq belə oturaq həyat tərzi ilə müqayisədə ciddi sağlamlıq üstünlüyü təmin edir.

Araşdırmanın müəlliflərindən biri, professor Melodi Din qeyd edib ki, burada əsas məsələ addım sayından çox hərəkət etmək vərdişini formalaşdırmaqdır. Bu xüsusilə oturaq həyat tərzi keçirən insanlar üçün önəmlidir: azca aktivlik belə sağlamlıq üçün böyük fərq yarada bilər.

Məlburn Universitetindən professor Kim Bennell isə bildirib ki, “10 min addım” anlayışı elmi əsaslara deyil, daha çox marketinq ideyasına söykənir. Onun fikrincə, daha sadə və real məqsədlər qoymaq onların davamlı tətbiqini asanlaşdırır.

Bu araşdırma həm fiziki, həm də psixoloji sağlamlıqla bağlı bu qədər geniş spektri əhatə edən ilk tədqiqat hesab olunur.