Yeni Klinikanın tanınmış həkim-nevroloqu Ülkər Mirzəzadə, CBC FM-də yayımlanan “Həkim vaxtı” verilişinin növbəti buraxılışında qonaq olub. Verilişin aparıcısı, Yeni Klinikanın əməkdaşı Eyyub Məmmədoğlu ilə birlikdə o, cəmiyyət üçün mühüm sağlamlıq mövzularından birini – insult xəstəliyini geniş şəkildə müzakirə edib.

Azmedinfo.az xəbər verir ki, veriliş zamanı Dr. Ülkər Mirzəzadə insultun yaranma səbəbləri, ilkin əlamətləri və qarşısının alınması yolları barədə geniş izahlar verib. Həkim, həmçinin insult zamanı düzgün ilkin tibbi müdaxilənin vacibliyini vurğulayıb və bu xəstəliklə bağlı insanları ən çox maraqlandıran sualları ətraflı cavablandırıb.

Dr. Ülkər Mirzəzadə bildirib ki, insultun əsas risk faktorları yüksək qan təzyiqi, şəkərli diabet, ürək xəstəlikləri, siqaret istifadəsi və stressdir. O, sağlam həyat tərzinin, müntəzəm tibbi müayinələrin və balanslı qidalanmanın insult riskini əhəmiyyətli dərəcədə azaltdığını qeyd edib.

Bundan əlavə, həkim-nevroloq tamaşaçılara insultun ilk əlamətləri – qəfil nitq pozğunluğu, üz əzələlərinin asimmetriyası, qolda və ayaqda ani zəiflik və başgicəllənmə kimi simptomlara dərhal reaksiya verməyin vacibliyini xatırladıb, vaxtında tibbi yardımın, erkən müdaxilənin əhəmiyyətini bir daha ön plana çəkib.

Daha ətraflı videoda.