Səhiyyə Nazirliyinin Respublika Qan Bankının icraçı direktorunun müavini Afət Zeynalova qan donorluğunun tibbi və sosial əhəmiyyətini vurğulayaraq qeyd edib ki, bu proses yalnız ehtiyacı olan insanlara həyat bəxş etmir, həm də donorun sağlamlığı üçün mühüm faydalar daşıyır.

Azmedinfo.az xəbər verir ki, Afət Zeynalovanın sözlərinə görə, beynəlxalq standartlara əsasən, İİV (QİÇS), sifilis, hepatit B və C kimi yoluxucu xəstəliklər, bəzi onkoloji və irsi qan xəstəlikləri, insulinə bağlı şəkərli diabet, ağır ürək-damar, qaraciyər, böyrək və sinir sistemi xəstəlikləri daimi kənarlaşdırma səbəblərinə daxildir. Müvəqqəti kənarlaşdırma halları isə kəskin respirator xəstəliklər, vaksinasiya, cərrahi əməliyyatlar, doğuş və malyariya riski olan ölkələrə səfərlərlə bağlı ola bilər.

Bir qanvermə zamanı donor orqanizmindəki ümumi qan həcminin 8-10%-ni itirsə də, bu proses təhlükəsizdir və bədəndə regenerasiya mexanizmlərini sürətləndirir. Nəticədə sümük iliyinin fəaliyyəti aktivləşir, immun sistem möhkəmlənir, plazma yenilənir, toksinlərin xaric olunması sürətlənir.

“Qanvermə qanın qatılaşmasını azaldır, damar divarlarına təzyiqi zəiflədir və hipertoniya, damar tıxanıqlığı riskini aşağı salır. Elmi araşdırmalar göstərir ki, müntəzəm qan verən şəxslərdə infarkt və insult riski 30-40% azalır”, – deyə Zeynalova vurğulayıb.

Afət xanım əlavə edib ki, donorun həyat xilas etdiyini bilməsi ona mənəvi rahatlıq, sosial faydalılıq hissi bəxş edir, stressi azaldır və psixoloji rifahı gücləndirir.

Ekspertin fikrincə, qan ehtiyatının sabitliyi yalnız fərdlərin sağlamlığı üçün deyil, həm də ölkənin səhiyyə təhlükəsizliyi baxımından mühüm strateji əhəmiyyət kəsb edir.