Hepatit B, qaraciyəri hədəf alan və ciddi sağlamlıq problemlərinə yol aça bilən viral infeksiyalardan biridir. Bu virus Hepatit B virusu (HBV) adlanır və dünya üzrə milyonlarla insan bu infeksiyanın daşıyıcısıdır. Xəstəlik həm kəskin, həm də xroniki formada özünü göstərə bilər, xronik hallarda isə qaraciyər sirrozu və qaraciyər xərçəngi kimi ağır fəsadlara səbəb ola bilər.

Azmedinfo.az xəbər verir ki, qastroenteroloq-hepatoloq, invaziv-endoskopist Dr. Aqil Ağakişiyevin sözlərinə görə, HBV-nin yoluxma yolları əsasən insan orqanizminə yoluxmuş qanın, sperma və ya digər bədən mayelərinin daxil olması ilə bağlıdır. Bu baxımdan hepatit B-nin yayılmasına şərait yaradan əsas risk faktorlarını aşağıdakı kimi qruplaşdırmaq olar:

İnsandan insana yoluxma yolları:

Virusa yoluxmuş şəxslə qorunmasız cinsi əlaqə;

İynə, şpris və ya narkotik maddələrin ortaq istifadəsi;

Qanla və açıq yaralarla təmas;

Steril olmayan tibbi və ya kosmetik alətlərlə prosedurlar (məsələn, döymə və pirsinq);

Eyni diş fırçası, ülgüc və ya dırnaq alətlərindən istifadə;

Doğuş zamanı anadan körpəyə yoluxma.

Xüsusilə risk altında olanlar – tibb işçiləri, qan transfuziyası keçirmiş şəxslər, çoxlu cinsi partnyoru olanlar və narkotik maddələrdən istifadə edənlər – bu virusun qarşısının alınması üçün mütəmadi yoxlanmalı və peyvəndlə qorunmalıdırlar.

Həkim qeyd edib ki, HBV çox davamlı virusdur, xarici mühitdə uzun müddət aktiv qala bilər. Bu səbəbdən gigiyena qaydalarına əməl olunmaması, alətlərin qeyri-steril istifadəsi və şəxsi əşyaların paylaşılması ciddi təhlükə yaradır.

Hepatit B-dən qorunmaq üçün nə etmək lazımdır?

HBV-yə qarşı peyvənd olunmaq;

Cinsi əlaqə zamanı qoruyucu vasitələrdən istifadə;

Tibbi və kosmetik prosedurlar zamanı steril şəraitə diqqət;

Uşaqların vaxtında doğumdan sonra peyvəndlənməsi;

Şəxsi gigiyena əşyalarının paylaşılmaması.

"Unutmayaq ki, hepatit B çox zaman simptomsuz keçə bilər, lakin orqanizmdə illərlə davam edən xroniki proseslərə səbəb ola bilər. Erkən diaqnostika və qoruyucu tədbirlər bu infeksiyanın cəmiyyətə yayılmasının qarşısını almaqda həlledici rol oynayır", - deyə ekspert vurğulayıb.