Levatoroplastika düz bağırsaq və anusun əzələlərini, xüsusilə levator ani əzələsini gücləndirmək və funksional vəziyyətini yaxşılaşdırmaq məqsədilə aparılan cərrahi əməliyyatdır.

Azmedinfo.az xəbər verir ki, M.Topçubaşov adına Elmi Cərrahiyyə Mərkəzinin Yoğun və Düz Bağırsaq Cərrahiyyəsi şöbəsinin müdiri, tibb üzrə fəlsəfə doktoru, proktoloq  Nərgiz Məmmədovanın sözlərinə görə, bu əməliyyat adətən anal prolaps (anus və ya düz bağırsağın sallanması), rektosele (qadınlarda düz bağırsağın vagina divarına doğru qabarması), anal inkontinensiya (nəcis saxlaya bilməmə) və ya obstruktiv defekasiya (bağırsağın boşalmasında çətinlik) kimi hallarda tətbiq olunur.

Qeyd edib ki, əməliyyat zamanı anusun ətrafındakı əzələlər, xüsusilə levator ani daraldılır və möhkəmləndirilir.

Proktoloq əsas məqsədləri sadalayıb:

• Anal sfinkterin gücləndirilməsi və nəcis saxlama funksiyasının yaxşılaşdırılması

• Daxili orqanların normal anatomik vəziyyətinin bərpası

• Defekasiya zamanı çətinliklərin aradan qaldırılması

• Doğuş və travma sonrası estetik və funksional korreksiyanın aparılması
  
  

Həkim  sağlamlıq problemlərində vaxtında peşəkar yardım alınmasının vacibliyini bir daha xatırladıb.