"Xankəndi" Futbol Klubu idarəetmə strukturunun daha da təkmilləşdirilməsi və klubun qarşıdakı inkişaf hədəflərinin daha səmərəli həyata keçirilməsi məqsədilə ard-arda mühüm addımlar atır. Klubun Ümumi Yığıncağı bu gün keçirilən iclasında Müşahidə Şurasının yaradılmasını qərara alıb.

Azmedinfo.az xəbər verir ki, keçirilən səsvermə nəticəsində Elgün Səmədov yekdilliklə "Xankəndi" FK-nın Müşahidə Şurasının sədri seçilib.

Qeyd edək ki, Müşahidə Şurası klubun strateji inkişaf istiqamətlərinin müəyyənləşdirilməsi, idarəetmə proseslərinin təkmilləşdirilməsi, klubun maliyyə və təşkilati fəaliyyətinə nəzarət, uzunmüddətli inkişaf planlarının hazırlanması və əsas qərarların qiymətləndirilməsi istiqamətində fəaliyyət göstərəcək. O, "Xankəndi" FK-nın idman siyasətinin, infrastruktur layihələrinin, akademiyanın inkişafının, sponsorluq və tərəfdaşlıq əlaqələrinin daha sistemli şəkildə qurulmasına öz töhfəsini verəcək.

"Xankəndi" Futbol Klubu qarşıya qoyduğu əsas məqsədlərdən biri kimi peşəkar idarəetmə modelinin formalaşdırılmasını, dayanıqlı inkişafı və Azərbaycan futbolunda xüsusi yer tutan bir klub quruculuğunu müəyyən edib. Müşahidə Şurasının yaradılması, məhz bu istiqamətdə atılan mühüm addımlardan biridir.

Azərbaycan Tibbi İnformasiya və Səhiyyə Portalı – azmedinfo.az-ın kollektivi tanınmış cərrah Elgün Səmədovu "Xankəndi" Futbol Klubunun yeni yaradılan Müşahidə Şurasının sədri seçilməsi münasibəti ilə səmimi qəlbdən təbrik edir, onun əvəzolunmaz töhfələri nəticəsində "Xankəndi" FK-nın qısa zamanda özünün dayanıqlı inkişafı, peşəkar klub modelinin formalaşdırılması və Azərbaycan futbolunda özünəməxsus mövqeyinin daha da möhkəmləndirilməsi istiqamətində qarşıya qoyduğu hədəflərə çatacağından əminliyini izhar edir.