Kompleks ginekoloji və proktoloji problemlərin uğurlu cərrahi həlli ilə pasiyentin vəziyyətində ciddi klinik yaxşılaşma müşahidə olunub.

Azmedinfo.az xəbər verir ki, M.Topçubaşov adına Elmi Cərrahiyyə Mərkəzinin Yoğun və Düz Bağırsaq Cərrahiyyəsi şöbəsinin müdiri, tibb üzrə fəlsəfə doktoru, proktoloq Nərgiz Məmmədova mürəkkəb klinik vəziyyətdə olan pasiyentin uğurlu müalicə prosesindən danışıb.

Həkim bildirib ki, pasiyent mərkəzə sidiyə getdikdə tam boşalma hissinin olmaması, defekasiya zamanı çətinlik və qəbizliyə meyillilik kimi şikayətlərlə müraciət edib. Aparılan hərtərəfli müayinə və funksional qiymətləndirmə nəticəsində xəstəyə mərhələli şəkildə kombinə olunmuş cərrahi müdaxilə qərara alınıb.

Qeyd edib ki, əməliyyat iki mərhələdə həyata keçirilib:

Birinci mərhələ
Ümumi anesteziya altında, Pfannenstiel kəsiyi ilə sallanmış uşaqlığın korreksiyası məqsədilə alloplastik material (TOR) vasitəsilə təsbit aparılıb. Bununla servikosakropeksiya əməliyyatı icra olunub. Bu müdaxilə uşaqlığın sallanması və ona bağlı sidik ifrazı pozğunluqlarının aradan qaldırılmasına yönəlib.

İkinci mərhələ
Daha sonra arxa kolporafiya və ön levatoroplastika əməliyyatları həyata keçirilib. Bu prosedurlar defekasiya aktının normallaşdırılması və çanaq dibi əzələlərinin gücləndirilməsini təmin edib.

Əməliyyatlardan sonra pasiyentin kompleks şikayətləri aradan qalxıb, klinik əlamətlərdə əlamətdar dərəcədə yaxşılaşma müşahidə olunub. Xəstənin vəziyyəti stabil olub və dinamik müşahidə altına alınıb.

Bu klinik hal bir daha göstərir ki, ginekoloji və proktoloji problemlərin inteqrativ yanaşma və mərhələli cərrahi müdaxilə ilə həlli, pasiyentlərin həyat keyfiyyətini nəzərəçarpacaq dərəcədə artırmağa imkan verir.