Hipoqlikemiya qanda şəkərin kritik səviyyədən aşağı düşməsi, diabetli xəstələr üçün ciddi, hətta həyati təhlükə kəsb edən bir vəziyyətdir. Vaxtında tanınmadığı və müdaxilə edilmədiyi təqdirdə, hipoqlikemik komaya qədər irəliləyə bilən bu haldır.

Azmedinfo.az xəbər verir ki, tanınmış endokrinoloq Rəhilə Mansur hipoqlikemiyanın səbəbləri, əlamətləri və ilkin yardım yolları barədə ətraflı məlumat verib: "Hipoqlikemiya, qanda şəkərin diabetli xəstələrdə 70 mq/dl-dən, diabeti olmayan şəxslərdə isə 50 mq/dl-dən aşağı düşməsi halıdır".

Qeyd edib ki, bu vəziyyət bir neçə səbəbdən yarana bilər:

Yanlış dərman dozası: Xəstənin təsadüfən yüksək doza insulin və ya oral antidiabetik dərman qəbul etməsi.

Yemək rejiminin pozulması: Şəkərli diabet xəstəsinin insulin və ya oral antidiabetik dərman qəbul etdikdən sonra əsas və ya ara yeməyi ötürməsi.

Həddindən artıq fiziki aktivlik: Həmişəkindən daha çox fiziki aktiv olub, dərman və qidalanmanı buna uyğun tənzimləməmək.

Alkoqol qəbulu: Alkoqol istifadəsi qanda şəkərin kəskin düşməsinə səbəb ola bilər.

Qadınlarda menstrual dövr: Menstruasiya zamanı bəzi qadınlarda qanda şəkərin səviyyəsində dəyişikliklər müşahidə oluna bilər.

"Hipoqlikemiya zamanı bədən müxtəlif siqnallar verir. Bu əlamətləri vaxtında tanımaq və düzgün reaksiya vermək həyati əhəmiyyət daşıyır", - deyə endokrinoloq bildirib və əlamətləri sadalayıb:

Halsızlıq, dəri rənginin avazıması,

Titrəmə, soyuq tər basması,

kKəskin aclıq hissi, ürəkbulanma,

Həyəcanlılıq, ürək döyüntülərinin tezləşməsi,

Başgicəllənmə və görmənin pozulması.

Rəhilə Mansur vurğulayır ki, xəstəni bu vəziyyətdən çıxarmaq üçün təcili tədbir görülməlidir. Xəstəyə 3-4 ədəd qənd və ya 1 stəkan (150-200 ml) meyvə şirəsi verilməlidir. Əgər növbəti yemək 30 dəqiqədən gecdirsə, təkrar hipoqlikemiyanın qarşısını almaq üçün yemək daha önə çəkilməlidir. Unutmayın ki, vaxtında yardım edilməzsə, xəstə huşunu itirə və hipoqlikemik komaya düşə bilər.

Endokrinoloqlar, diabetli xəstələri qanda şəkər səviyyəsinə nəzarət etməyə, düzgün qidalanma rejiminə riayət etməyə və dərmanlarını vaxtında qəbul etməyə çağırır. Hər hansı narahatlıq hiss etdiyinizdə dərhal həkiminizə müraciət edin.