M.Topçubaşov adına Elmi Cərrahiyyə Mərkəzinin Yoğun və Düz Bağırsaq Cərrahiyyəsi şöbəsinin müdiri, tibb üzrə fəlsəfə doktoru, proktoloq Nərgiz Məmmədova appendisit diaqnozu və onun cərrahi müalicəsi barədə məlumat verib.

Azmedinfo.az-a verdiyi açıqlamada həkim bildirib ki, "Fleqmonoz dəyişikliyə uğramış appendikulyar çıxıntı" ifadəsi appendisit xəstəliyinin ağır formalarından birinə işarə edir. Qeyd edək ki, appendiks xalq arasında kor bağırsağın çıxıntısı kimi tanınır. "Fleqmonoz dəyişikliyə uğrama" isə appendiksin iltihablaşma nəticəsində şişdiyini, qızardığını və irinlədiyini göstərir. Bu vəziyyət təcili tibbi müdaxilə tələb edir.

Əməliyyat prosesinə gəldikdə isə, "Sağ pararektal kəsik ilə xaric edilmə" yəni cərrahi əməliyyatın icra olunduğu kəsik növünü bildirir. Bu kəsik, sağ tərəfdə, göbək ilə qasıq arasındakı nahiyədə aparılır və appendiksin çıxarılması (appendektomiya) üçün standart yanaşmalardan biridir.

Unutmayın ki, sağlamlığınıza diqqət etmək və hər hansı narahatlıq hiss etdiyinizdə mütəxəssislərə müraciət etmək mütləqdir. Vaxtında diaqnoz və müalicə ağırlaşmaların qarşısını alır.