ABŞ-ın Yale Universiteti tərəfindən hazırlanmış fərdiləşdirilmiş xərçəng peyvəndi 9 böyrək xərçəngi xəstəsində şişləri müvəffəqiyyətlə məhv edib. Peyvənd immunitet sistemini gücləndirərək xərçəng hüceyrələrini hədəf alır. Faza 2 tədqiqatları davam edir.

Azmedinfo.az xəbər verir ki, universitetin mətbuat xidmətindən verilən məlumata görə, 2019-cu ilin martından 2021-ci ilin sentyabrına qədər tədqiqatda iştirak edən bütün xəstələrin 2023-cü ilin iyulunda keçirilən üç illik təkrar müayinədə xərçəngdən azad olduğu aşkarlanıb və bu, əhəmiyyətli bir uğura işarə edib.

Peyvənd əməliyyatdan sonra qalan xərçəng hüceyrələrini hədəfə alıb və sağlam hüceyrələrə zərər vermədən onları yox edib. Yale Xərçəng Mərkəzi və Dana-Farber Xərçəng İnstitutu tərəfindən hazırlanmış peyvənd xüsusi olaraq hər bir xəstənin bioloji xüsusiyyətlərinə uyğunlaşdırılaraq, immunitet sisteminin yalnız şişə xas mutasiyaları tanımasını və məhv etməsini təmin edib.

Xərçəng peyvəndi onkologiyada inqilab edə bilərmi?

Onkologiya tədqiqatçıları indiyədək müxtəlif xərçəng növlərinin immun sistemindən yayınmasının qarşısını ala biləcək bir peyvənd hazırlamaq üçün mübarizə aparıblar. Bununla belə, Yale Universiteti tərəfindən hazırlanmış bu fərdiləşdirilmiş xərçəng peyvəndi xərçəng müalicəsində təməlqoyma addımı ola bilər.

Böyrək hüceyrəli karsinoma dünyada ən çox görülən 10 xərçəng növü arasındadır. Dünyada hər il 400 000-dən çox yeni yoluxma halı aşkar edilsə də, ABŞ-da bu rəqəm 80 000 civarındadır.

Siqaret çəkmək, piylənmə, yüksək təzyiq, genetik faktorlar və ailədə böyrək xərçənginin olması bu xəstəliyin inkişaf riskini artırır. İllər keçdikcə diaqnoz nisbətlərinin artmasının daha təkmil skrininq üsulları və məlumatlılığın artması ilə əlaqədar olduğu düşünülür.