Xəstə üzərində eyni anda 3 mürəkkəb cərrahi əməliyyat icra edildi

26 Fevral 2025

854

Xəstə üzərində eyni anda 3 mürəkkəb cərrahi əməliyyat icra edildi

Region əhalisi üçün tibbi əlçatanlığın təmin olunması istiqamətində tədbirlər davam etdirilir. Əsasən, paytaxtdakı ixtisaslaşmış tibb müəssisələrində icra olunan müəyyən cərrahi əməliyyatlar artıq region xəstəxanalarında da həyata keçirilir.

Azmedinfo.az xəbər verir ki, Qəbələ Rayon Mərkəzi Xəstəxanasında eyni anda bir pasiyent üzərində keçirilən 3 mürəkkəb cərrahi əməliyyat uğurla başa çatıb.

Həkim-cərrah Fariz Abdullayev, assistent həkim-cərrah-uroloq Elçin Bağırlı və həkim-anestezioloq-reanimatoloq Azər Söhbətov tərəfindən həyata keçirilən sol sidik axarının stentləşdirilməsi, S-vari bağırsağın rezeksiyası və kolostomanın qoyulması əməliyyatları açıq üsulla icra edilib.

Qeyd edək ki, xəstəxanaya müraciət edərkən pasiyentə S-vari bağırsağın çoxsaylı divertikuliti, parakolik abseslə ağırlaşması (sol yan kanalda böyük abses), absesin sol sidik axarı ilə invaziv bitişmələri diaqnozları təyin edilib və dərhal cərrahi əməliyyata qərar verilib.

Müalicəsi Cərrahiyyə şöbəsində davam etdirilən pasiyentin vəziyyəti stabil qiymətləndirilir.

Pasiyentin ailə üzvləri Qəbələ Rayon Mərkəzi Xəstəxanasında yaradılan şəraitə, müasir tələblərə cavab verən yeni tibbi avadanlıqlarla təmin edildiyinə görə Prezident cənab İlham Əliyevə, Birinci-vitse prezident Mehriban xanım Əliyevaya, TƏBİB-ə və İcbari Tibbi Sığorta üzrə Dövlət Agentliyinə öz minnətdarlıqlarını bildiriblər.