Dünyada təqribən 7000 nadir xəstəlik müəyyən edilmişdir ki, onların da əksəriyyəti uşaqlardır, təxminən 400 milyon insana təsir edir.

Azmedinfo.az EURORDIS-ə istinadən yazır ki, Avropa Nadir Xəstəliklər Təşkilatı (EURORDIS) maarifləndirmə məqsədi ilə hər il fevral ayının son gününü “Ümumdünya Nadir Xəstəliklər Günü” elan edib. 2008-ci ildən qeyd olunan “Ümumdünya Nadir Xəstəliklər Günü” bu il fevralın 28-nə təsadüf edir.

ABŞ-ın Milli Sağlamlıq İnstitutunun (NIH) məlumatına görə, dünyada təxminən 7 min nadir xəstəlik müəyyən edilib. Təxminən 400 milyon insan bu xəstəliklərlə mübarizə aparır.

Məlumdur ki, nadir xəstəliklərin təqribən 80 faizi irsi, 20 faizi isə infeksiya, allergiya və ətraf mühit faktorları vasitəsilə insanlara təsir edir.

EURORDIS-in məlumatına görə, dünya əhalisinin təxminən 5 faizini əhatə edən nadir xəstəliklərin 75 faizi uşaqlarda müşahidə edilir.

Nadir xəstəliklərin tərifi ölkədən ölkəyə dəyişə bilər

Eyni xəstəliklə mübarizə aparan insanlarda müxtəlif simptomların müşahidə edilməsi və nadir xəstəliklərlə bağlı adekvat tədqiqatların olmaması xəstəliyin müəyyənləşdirilməsini çətinləşdirir. Bu səbəbdən nadir xəstəliklərin tərifi ölkədən ölkəyə fərqli ola bilər.

ABŞ-da 200.000-dən az insanı əhatə edən xəstəliklər "nadir", Avropa İttifaqında (Aİ) isə 10.000 nəfərdən 5-nə təsir edən xəstəliklər "nadir" kimi təsnif edilir. Avropada 36 milyondan çox insan nadir bir xəstəliklə yaşayır, ABŞ-da isə təxminən 30 milyon.

Ümumdünya Səhiyyə Təşkilatının (ÜST) məlumatına görə, Böyük Britaniyada təxminən 100.000 nəfərdən 65-i və hər 2.000 nəfərdən 1-i təsir edən xəstəliklər "nadir" kateqoriyasındadır.