Bu gün dünya miqyasında milyonlarla insanın sağlamlığını təhlükə altına alan piylənmə probleminə qarşı birləşdiyimiz gündür.

Azmedinfo.az xəbər verir ki, Ümumdünya Səhiyyə Təşkilatının (ÜST) məlumatlarına görə, son onilliklərdə piylənmənin yayılma tempi kəskin şəkildə artıb və bu, bir çox ciddi xəstəliklərin – şəkərli diabet, ürək-damar xəstəlikləri, yüksək təzyiq və hətta xərçəng riskinin yüksəlməsinə səbəb olur.

Dahi alimlər və tanınmış həkimlər piylənmənin insan sağlamlığına vurduğu zərərlə bağlı daim xəbərdarlıq ediblər. Hələ Hippokrat qeyd edirdi: “Qida sənin dərmanın, dərmanın isə qida olmalıdır” – bu fikir piylənmənin əsas səbəblərindən birinin yanlış qidalanma olduğunu sübut edir.

Məşhur həkim və alim İbn Sina isə əsərlərində belə bir məsləhət verirdi: “Hərəkətsizlikdən çəkin, çünki bu, bədənin düşmənidir”. Müasir dövrümüzdə də həkimlər və sağlamlıq mütəxəssisləri fiziki aktivliyin piylənmənin qarşısını almaqda əsas amillərdən biri olduğunu vurğulayırlar.

Harvard Tibb Məktəbinin professoru və endokrinoloq Corc Brey bildirir ki, “Piylənmə təkcə estetik problem deyil, ciddi tibbi vəziyyətdir. Onun qarşısını almağın ən yaxşı yolu sağlam qidalanma və nizamlı fiziki aktivlikdir”.

Ekspertlər nə məsləhət görür?

- Şəkərli və yağlı qidalardan uzaq durmaq
- Meyvə-tərəvəzi qidalanmaya daxil etmək
- Gün ərzində ən azı 30 dəqiqə fiziki aktiv olmaq
- Kifayət qədər su içmək və stressi idarə etmək

Unutmayaq ki, hər birimiz öz sağlamlığımızın memarıyıq.