Böyük Britaniya, İtaliya, Tayvan və Fransanın bir sıra universitetlərindən olan tədqiqatçılar aspirinin xərçəngin inkişafına necə təsir etdiyini öyrənə biliblər.

Azmedinfo.az xəbər verir ki, “Nature” elmi jurnalında dərc olunan məqalədə elm adamları məşhur dərmanın xərçəng hüceyrələrinin bütün bədənə yayılmasının qarşısını alma mexanizmini ətraflı izah ediblər.

Laboratoriya siçanları üzərində aparılan təcrübələr zamanı mütəxəssislər müəyyən ediblər ki, aspirin qəbulu döş xərçəngi, kolon xərçəngi və melanoma da daxil olmaqla bədxassəli şişlərin metastazı ehtimalını azaldır. Tədqiqatçılar, aspirin verilən heyvanların qaraciyər və ağciyər kimi orqanlarda metastaz olma ehtimalının nəzarət qrupunda olanlara nisbətən daha az olduğunu aşkar ediblər.

Aspirinin əsas təsiri onun iltihabi prosesləri boğmaq qabiliyyəti ilə əlaqəli olduğu ortaya çıxb. Məlumdur ki, dərman tromboksan A2 istehsalına cavabdeh olan fermentin fəaliyyətini bloklayır. Bu maddə qan damarlarının daralmasına və qan laxtalarının əmələ gəlməsinə təsir göstərir, lakin məlum olduğu kimi, T-limfositlərin - xərçəng hüceyrələrinin məhvində iştirak edən immun sisteminin hüceyrələrinin fəaliyyətini də boğur. Tromboksan A2 səviyyəsinin aspirinlə aşağı salınması immunitet sisteminin şişin yayılması ilə daha yaxşı mübarizə aparması ilə nəticələndi.

Əldə edilən məlumatlar alimlərə aspirinin metastatik xərçəngin müalicəsində köməkçi vasitə kimi istifadə oluna biləcəyini təklif etməyə imkan verib. Bununla belə, bu fərziyyəni qəti şəkildə təsdiqləmək üçün əlavə tədqiqatlar tələb olunacaq. Mütəxəssislər həmçinin aspirinin terapevtik effektini artırmaq üçün onun müasir immunoterapiya üsulları ilə birləşdirilməsi imkanlarını nəzərdən keçirirlər.