ABŞ-da doğulan və ötən ilin avqustunda 117 yaşında İspaniyada vəfat edən Maria Branyas Morera uzun ömür sürməsini “uğur və yaxşı genlər”lə əlaqələndirib.

Azmedinfo.az Kataloniyada nəşr olunan “Ara” qəzetinə istinadən yazır ki, alimlərin apardığı araşdırma bu qiymətləndirmənin doğru olduğunu üzə çıxarıb. Barselona Universitetinin Genetika professoru Manel Estellerin rəhbərliyi ilə aparılan araşdırmada, Branyasın genetik quruluşunun onun hüceyrələrini olduğundan 17 yaş daha gənc hiss etdirdiyi və hərəkət etdiyi müəyyən edilib.

Bundan əlavə, bağırsaq mikrobiotasının körpəninkinə bənzədiyi aşkarlanıb. “Ara” qəzeti martın əvvəlində Branyasın “imtiyazlı genomu” ilə bağlı araşdırmanın nəticələrini dərc edib. Araşdırmada Branyasın həyatının sonuna qədər zehni aydınlığını qoruduğu və yalnız qocalıqda oynaq ağrısı və eşitmə itkisi kimi sağlamlıq problemlərindən əziyyət çəkdiyi qeyd edilib.

Tədqiqatçılar Branyasın uzun ömür sürməsində təkcə genetik faktorların deyil, sağlam həyat vərdişlərinin də təsirli olduğunu vurğulayıblar. Branyas Aralıq dənizi pəhrizinə riayət edib və hər gün üç qatıq qəbul edib. Spirtli içki və siqaretdən uzaq olub, müntəzəm gəzintilər edib və ailəsi ilə daimi vaxt keçirib.

Alimlər qeyd ediblər ki, bu vərdişlər həm fiziki, həm də ruhi sağlamlığı qorumağa kömək edir.

Dul ana və ulu nənə olan Branyas avqustun 19-da Kataloniyanın şimal-şərqindəki Olot şəhərində 20 il yaşadığı qocalar evində dünyasını dəyişib.

"World Supercentenarians Data Center"in məlumatına görə, 13 mart 2025-ci il tarixindən etibarən dünyanın ən yaşlı insanı 116 yaşlı braziliyalı İnah Canabarro Lukas olacaq.