Yeni araşdırma beyin implantlarının təhlükəsizliyi ilə bağlı heyrətamiz bir həqiqəti ortaya qoydu. Bu cihazlar bakteriyaların beyinə çatmasına səbəb ola bilər.

Azmedinfo.az "Nature Communications" elmi jurnalına istinadən xəbər verir ki, insult, epilepsiya və digər nevroloji xəstəliklərin müalicəsində vəd verən beyin implantları indi daha bir təhlükə ilə gündəmdədir.

ABŞ-ın "Case Western Reserve" Universitetinin alimləri implantasiyadan sonra beyin toxumasında bakteriya aşkar ediblər. Müəyyən edilib ki, bu bakteriyalar iltihabı tətikləyir, bu da cihazların uzunmüddətli uğuruna mənfi təsir göstərə bilər.

Tədqiqat nüfuzlu "Nature Communications" elmi jurnalında dərc edilib və bu sahədə dizaynlarda inqilab etmək potensialına malikdir.

Tədqiqatda siçanların beyninə yerləşdirilən mikroelektrodlar araşdırılıb. Alimlər bu beyin toxumalarında bağırsaq bakteriyalarına aid DNT izlərini aşkar ediblər. Bu vəziyyət implant yerləşdirmə zamanı “qan-beyin baryerinin” zədələnməsinin bakteriyaların keçməsinə imkan verdiyini ortaya qoyur.

Siçanlara tətbiq edilən antibiotik müalicəsi bakterial çirklənməni azaltmaqla cihazların işini yaxşılaşdırsa da, uzun müddətli antibiotik istifadəsinin zərərli olduğu müəyyən edilib. Üstəlik, beyində aşkar edilən bəzi bakteriyaların Alzheimer, Parkinson və insult kimi ciddi nevroloji xəstəliklərlə əlaqəli olduğu bilinir.