Yaponiyanın Tokio şəhərindəki Keio Universitetinin tədqiqatçıları kök hüceyrə terapiyasında əsaslı inkişafa nail olublar. İnkişaf onurğa beyni iflici olan insanlara ümid verib.

Azmedinfo.az "CNN Türk"ə istinadən xəbər verir ki, Yaponiyada aparılan bir klinik araşdırma, onurğa beyninin zədələnməsi səbəbindən iflic olan dörd xəstədən ikisinin motor funksiyasını yaxşılaşdırmağa kömək etdiyini açıqlayıb.

Yalnız Yaponiyada 150 000-dən çox insana təsir edən ağır onurğa beyni zədələri nəticəsində yaranan iflicin hazırda effektiv müalicəsi yoxdur, ölkədə hər il 5 000 yeni hadisə baş verir.

Yapon tədqiqatçılar öz işlərini yetkin hüceyrələrin stimullaşdırılması ilə yaradılan induksiya edilmiş pluripotent kök hüceyrələrdən istifadə etməklə aparıblar. 

Universitetdən verilən açıqlamaya görə, onurğa beyninə iki milyondan çox kök hüceyrənin yerləşdirildiyi əməliyyatdan sonra iki xəstənin motor funksiyalarının yaxşılaşdığı vurğulanıb. Həmçinin qeyd edilib ki, bir illik təqibdən sonra dörd hadisənin heç birində ciddi yan təsirlər müşahidə olunmayıb.