Rusiya Elmlər Akademiyasının Novosibirskdəki Sibir bölməsinin Nəzəri və Tətbiqi Mexanika İnstitutu keramika əsasında süni ürək hazırlayır.

Azmedinfo.az xəbər verir ki, TASS bu barədə institutun direktoru Yevgeni Krausa istinadən məlumat yayıb.

Layihənin məqsədi idxal olunan bahalı sistemləri əvəz etməkdir. Alimin izah etdiyi kimi, xarici analoqlar yüksək qiymətə görə yalnız məhdud sayda xəstələr üçün mövcuddur.

Alimlər nəinki daha qənaətcil, həm də texnoloji cəhətdən daha təhlükəsiz olacaq bir həll təklif etmək niyyətindədirlər.

Layihə Milli Tibbi Elmi-Tədqiqat Mərkəzi ilə birgə həyata keçirilir. Bu mərkəz artıq institutda yaradılmış diskli nasosu sınaqdan keçirib.

Cihaz qırmızı qan hüceyrələrinin aşağı səviyyədə məhv olduğunu göstərib və heyvanlar üzərində testindən uğurla keçib.

Mühəndislik hesablamaları və çertyojları artıq tamamlanıb. Əsas material kimi keramika seçilib - bu, həddindən artıq istiləşmədən qaçınmağa kömək edir və aşınma müqavimətini artırır.

Xarici naqilləri tamamilə aradan qaldırmaq üçün dəri vasitəsilə simsiz enerji ötürülməsinin tətbiqi də planlaşdırılır. "Bu, infeksiya riskini aradan qaldırır və cihazı xəstə üçün daha rahat edir", - deyə alim  izah edib.