İlk növbədə burun qanaması olan insanı sakitləşdirməyə çalışın. Stress və qorxu qan təzyiqini artırmaqla qanamanın şiddətini artıra bilər. Qanın mədəyə getməsinin qarşısını almaq üçün xəstə başını önə əyməlidir. Burnun qığırdaq olan ön hissəsi tam şəkildə tutmaq şərtilə baş barmaq və işarət barmağı ilə 5-10 dəqiqəyə sıxılmalıdır. Bunun sayəsində burun qanamasının qarşısı bir müddət alınmış olur.

Azmedinfo.az xəbər verir ki, həkim Xatirə İsmayılova burun qanaması zamanı edilən ilkin müdaxilədən və müalicədən bəhs edib.

Həkim qeyd edib ki, qanama dayanmırsa, dərhal ən yaxın səhiyyə müəssisəsinə müraciət edilməlidir: "Burun qanamalarının qəti həlli səbəbin müalicəsi ilə ortaya çıxır. Ön burun hissəsində yaranan qanaxmalar (bu tip qanaxmalar adətən kiçik və təhlükəsiz olur) kiçik bir tampon müdaxiləsi ilə dayandırıla bilər. Qanama dayandıqda yumşaldıcı maddələr və yara sakitləşdirici kremlər tövsiyə edilir. Təkrarlanan burun qanamaları zamanı mütləq qulaq burun-boğaz mütəxəssisinə müraciət edilməlidir".

Həkimin sözlərinə görə, endoskopik müayinə burun qanamasının yerini təyin etmək üçün istifadə edilə bilər. Qanamaya səbəb olan damarlar kimyəvi və ya elektrikli vasitələrlə yandırıla bilər.

Əlavə edib ki, qanamaya səbəb burun əyriliyi və ya burunda yaranan artıq ət problemidirsə, cərrahi üsullar tətbiq edilir. Burun boşluğunda şişin yaranmasından şübhə duyulursa, müayinə olunmalı və lazımi müalicə edilməlidir.

Posterior burun qanamalarında burun arxasına qanama sahəsinə təzyiq tətbiq etməsi üçün xüsusi tamponlar tətbiq olunur. Bütün hallarda həkimə müraciət etməyiniz önərilir.