Amerikanın Beynəlxalq Maharişi Universitetinin mütəxəssislərinin tədqiqatının nəticələri barədə məlumat açıqlanıb. Tədiqiat bizə belə qənaətə gəlməyə imkan verir ki, müntəzəm transsendental meditasiya təcrübəsi stressin təsirini əhəmiyyətli dərəcədə azaldır və orqanizmin qocalmasının bioloji proseslərini ləngidir.

Azmedinfo.az “Biomolecules” elmi nəşrinə istinadən yayır ki, alimlər 12 və 40 il ərzində meditasiya ilə məşğul olan və heç vaxt buna əl atmayan qrupların sağlamlıq göstəricilərinin müqayisəli təhlilini aparıblar. Meditatorların onilliklər ərzində stress hormonu hesab edilən kortizol səviyyəsinin aşağı olduğu aşkar edilib. Eyni kateqoriyalı meditatorlarda iltihab proseslərinə cavabdeh olan genlərin, eləcə də yaşa bağlı dəyişikliklərə və metabolik pozğunluqlara nəzarət edən genlərin aşağı aktivliyi aşkarlanıb.

Elm adamları uzunmüddətli praktikantların idrak qabiliyyətlərini xüsusilə yaxından araşdırıblar. Onların daha gənc yaş qrupunun parametrlərinə bənzədiyi ortaya çıxıb. Ensefaloqrafiya onlarda artan beyin inteqrasiyasını aşkar edib ki, bu da konsentrasiyanın yaxşılaşması və reaksiya sürətinin artması ilə əks olunub.