İstanbul NS Klinikasının mütəxəssisi Şəfəq Əliyeva ilə müsahibə

Saç tökülməsi bir çox insan üçün sadəcə estetik problem deyil, eyni zamanda psixoloji narahatlıqlara səbəb olan ciddi bir məsələdir. Müasir tibb və texnologiyanın inkişafı bu sahədə əhəmiyyətli yeniliklərə yol açıb və saç əkimi prosedurları artıq daha təhlükəsiz, effektiv və təbii nəticələr vəd edir.

Bu dəfə İstanbul NS Klinikasının təcrübəli saç əkimi mütəxəssisi Şəfəq Əliyeva ilə söhbətləşdik. Müsahibədə saç əkimi sahəsində ən son texnologiyalardan, pasiyentlərlə psixoloji yanaşmadan, bu prosedurla bağlı yayılan miflərdən və uğurlu nəticələrin uzunmüddətli qorunması üçün tətbiq edilən metodlardan bəhs etdik.

Azmedinfo.az-ın təqdim etdiyi müsahibə ilə bu sahənin pərdəarxasına birlikdə nəzər salaq.

- Saç əkimi sahəsində ən son texnologiyalar və yanaşmalar nələrdir? İstanbul NS Klinikasında bu sahədə hansı yenilikçi metodları tətbiq edirsiniz və bu, xəstələr üçün hansı üstünlükləri təqdim edir?

- Son illərdə saç əkimi texnologiyasında böyük irəliləyişlər müşahidə olunur. Xüsusilə Safir FUE və DHI (Direct Hair Implantation) metodları bu sahədə inqilabi yeniliklər hesab olunur. İstanbul NS Klinikasında biz hər iki texnologiyanı xəstənin ehtiyacına uyğun olaraq tətbiq edirik.

Safir FUE metodunda, klassik FUE-dən fərqli olaraq, mikrokəsiklər safir uçlu alətlərlə edilir ki, bu da daha az travma və daha sürətli sağalma deməkdir. DHI metodunda isə saç follikulları xüsusi Choi qələmləri ilə birbaşa əkilir. Bu, saçların sıx və təbii görünməsini təmin edir, xüsusilə də ön saç xəttinin formalaşdırılmasında əvəzolunmazdır.

Bu yanaşmalar sayəsində xəstələrimiz daha az ağrı, daha az sağalma müddəti və estetik cəhətdən daha təbii nəticələr əldə edirlər.

- Saç əkimi əməliyyatı insanların özünə güvənini artıran bir prosedur olaraq tanınır. Pasiyentlərin psixoloji vəziyyətinə necə yanaşırsınız və onlara əməliyyat öncəsi və sonrası hansı dəstəyi təklif edirsiniz?

- Saç tökülməsi bir çox insan üçün sadəcə fiziki deyil, psixoloji travma da yaradır. Bu səbəblə, İstanbul NS Klinikasında pasiyentlərimizlə təkcə tibbi deyil, həm də emosional səviyyədə ünsiyyət qurmağa önəm veririk.

Əməliyyatdan əvvəl pasiyentlərlə geniş məsləhətləşmə aparılır. Onların gözləntiləri, narahatlıqları və keçmiş təcrübələri diqqətlə dinlənilir. Gərəkli olduqda psixoloji dəstək xidməti də təklif olunur.

Əməliyyatdan sonra isə onları tək buraxmırıq. Həm tibbi, həm də motivasiyaedici baxımdan izləmə aparılır. Bərpa dövründə pasiyentlərlə mütəmadi əlaqə saxlayır, onların emosional rifahını da daim nəzərdən keçiririk.

- Saç əkimi sahəsindəki ən yaygın səhvlər və ya anlaşılmayan məqamlar hansılardır? Xəstələrin gözləmələrinin və gerçək nəticələrin arasındakı fərqi necə izah edirsiniz?

- Ən çox yayılan yanlış anlayışlardan biri budur ki, saç əkdirən pasiyentlərin əksəriyyəti nəticəni qısa müddətdə görmək istəyir. Halbuki bu prosesin tam nəticəsi adətən 9-12 ay ərzində ortaya çıxır. İlk aylarda tökülmə və sonra yenidən çıxma mərhələləri var ki, bu, xəstələr üçün narahatlıq yarada bilər.

Digər bir yanlış fikir isə saç əkiminin bütün hallarda 100% sıxlıq verəcəyinə dair gözləntidir. Əgər donor sahə məhduddursa, bu, nəticənin sıxlığına təsir edə bilər. Bu səbəblə biz klinikamızda pasiyentlərlə açıq danışır, onların anatomik imkanlarına uyğun real nəticələri göstəririk.

Əlavə olaraq, sosial mediada "möcüzəvi" dəyişikliklərə aldanmamaq üçün xəstələri məlumatlandırırıq. Gerçək foto və videolarla prosesin mərhələlərini izah edirik.

- Saç əkimi əməliyyatı uğurlu olduqda, prosesin sonrakı mərhələlərində bərpa və nəticələrin qalıcılığı necə təmin edilir? İstanbul NS Klinikasında əməliyyatdan sonra xəstələrə necə xüsusi bir izləmə proqramı təqdim edirsiniz?

- Uğurlu saç əkimi əməliyyatı yalnız əməliyyat otağında bitmir – sonrakı mərhələlər də bir o qədər önəmlidir. İstanbul NS Klinikasında əməliyyatdan sonra fərdi izləmə proqramı təqdim edirik. Bu proqram çərçivəsində pasiyentə lazımi saç baxımı məhsulları verilir, ilk 10 gün ərzində necə qulluq etməli olduğu izah olunur və yazılı şəkildə təqdim edilir. Lazım gələrsə mütəmadi olaraq klinikaya nəzarət üçün dəvət edilir və ya onlayn müayinə imkanı verilir. Eyni zamanda dəri və saç baxımı üçün xüsusi məhsullar və serumlar tövsiyə olunur. Əgər ehtiyac olarsa, PRP və mezoterapiya dəstəyi də təqdim edirik ki, bu da əkilmiş saçların qidalanmasına və böyüməsinə kömək edir. Bütün bu tədbirlər saçların daha sağlam və qalıcı şəkildə bərpa olunmasını təmin edir.

- Müsahibə üçün təşəkkür edirik!