Diabetik nefropatiya şəkərli diabetin böyrəklərdə damar zədələnməsi ilə müşayiət olunan və ciddi fəsadlara yol aça bilən xroniki ağırlaşmasıdır. Bu hal, şəkərli diabetə bağlı ölüm səbəbləri arasında mühüm yer tutur.

Azmedinfo.az xəbər verir ki, endokrinoloq Rəhilə Mansurun sözlərinə görə, diabetik nefropatiya (DN) tip 1 diabetli şəxslərdə diaqnoz qoyulduqdan 5-15 il sonra, tip 2 diabetli şəxslərdə isə artıq diaqnozun qoyulduğu andan etibarən müşahidə edilə bilər. Xəstəliyin erkən mərhələsi simptomsuz keçsə də, sidik analizində mikroalbuminuriya aşkarlanması DN diaqnozunun göstəricisidir.

Xəstəliyin irəliləmiş mərhələlərində isə arterial təzyiqin yüksəlməsi, sidikdə zülal atılımı ilə bağlı əl və ayaqlarda şişkinlik, çəki artımı, tez-tez sidiyə getmə, iştahasızlıq, ürəkbulanma və qusma kimi əlamətlər müşahidə oluna bilər.

Həkim xəbərdarlıq edir ki, DN vaxtında nəzarət və müalicə olunmadıqda xroniki böyrək çatışmazlığına, nəticədə isə dializ və böyrək köçürülməsi əməliyyatına gətirib çıxara bilər.

Endokrinoloq böyrəklərinizi qorumaq üçün aşağıdakı məqamlara diqqət yetirilməsini tövsiyə edir:

• Qanda şəkər səviyyəsi mütəmadi olaraq nəzarətdə saxlanılmalı;

• Arterial təzyiq normada saxlanılmalı;

• Günlük zülal və duz qəbuluna nəzarət edilməli;

• Xolesterin dərmanları təyin olunubsa, onlar düzgün və vaxtında qəbul edilməli;

• Siqaret istifadəsi dərhal dayandırılmalı;

• Fiziki aktiv həyat tərzi seçilməli.

Xəstəliyin fəsadlarından qorunmaq üçün həkim nəzarətində olmaq və tövsiyələrə ciddi əməl etmək həyati əhəmiyyət daşıyır.