Doğuş və yaşlanma ilə əlaqədar qadınlarda tez-tez rast gəlinən uşaqlıq (və ya uşaqlıq boynu) sallanması problemi bu gün müasir cərrahiyyə üsulları ilə uğurla aradan qaldırıla bilir.

Azmedinfo.az xəbər verir ki, M.Topçubaşov adına Elmi Cərrahiyyə Mərkəzinin Yoğun və düz bağırsaq cərrahiyyəsi şöbəsinin müdiri, tibb üzrə fəlsəfə doktoru Nərgiz Məmmədovanın sözlərinə görə, bu hallarda tətbiq olunan ən effektiv üsullardan biri alloplastik servikosakropeksiya əməliyyatıdır.

Həkim bildirib ki, bu əməliyyat zamanı uşaqlıq boynu xüsusi tibbi tor (mesh) vasitəsilə onurğanın aşağı hissəsinə – sakrum sümüyünə bərkidilir. Məqsəd orqanın yerində saxlanması və sallanmanın qarşısının alınmasıdır.

Buna aydınlıq gətirən Nərgiz Məmmədova belə sadalayıb:

- “Alloplastik” – əməliyyatda bədənin öz toxuması deyil, xüsusi sintetik tor materialının istifadə olunduğunu ifadə edir.
- “Serviko” – uşaqlıq boynuna (serviks) aiddir.
-  “Sakro” – onurğanın aşağı hissəsində yerləşən sakrum sümüyünü bildirir.
- “Peksiya” – bağlama və möhkəmləndirmə əməliyyatını ifadə edir.

Bu cərrahi müdaxilə, əsasən doğuşdan və ya yaş artımından sonra daxili orqanların yerdəyişməsi fonunda yaranan sallanma hallarında həyata keçirilir. Əməliyyatın əsas məqsədi qadının həyat keyfiyyətini yaxşılaşdırmaq, sidik və bağırsaq sistemində yaranan problemlərin qarşısını almaqdır.

Mütəxəssisin sözlərinə görə, alloplastik servikosakropeksiya minimal invaziv üsulla aparıla və xəstənin qısa müddətdə normal həyatına dönməsi təmin oluna bilər.