Amerikalı alimlər müəyyən ediblər ki, qripə qarşı peyvənd qadınlarda menstrual tsikldə kiçik müvəqqəti dəyişikliklərə səbəb ola bilər.

Azmedinfo.az xəbər verir ki, araşdırmanın nəticələri "JAMA Network Open" tibb jurnalında dərc olunub.

1501 qadın üzərində aparılan araşdırma zamanı peyvəndin dövrünün müddətini orta hesabla 0,4 gün artırdığı müəyyən edilib. Peyvənd dövrün ilk yarısında tətbiq edildikdə təsir xüsusilə nəzərə çarpır.

Daha aydın dəyişikliklər - 8 günə qədər - iştirakçıların 5-6% -ində müşahidə edilib, lakin növbəti dövrdə bütün göstəricilər normala qayıdıb. Maraqlıdır ki, qripə və COVID-19-a qarşı eyni vaxtda peyvəndləmə də oxşar effekt verib - dövrədə orta hesabla 0,49 gün artım.

Tədqiqatçılar həkimlərə bu cür dalğalanmaların sağlamlıq üçün təhlükə yaratmadığını vurğulayaraq, mümkün müvəqqəti dəyişikliklər barədə xəstələrə xəbərdarlıq etməyi tövsiyə edirlər.

Bu, lazımsız narahatlıqların qarşısını almağa və peyvəndlə bağlı dezinformasiyaya qarşı çıxmağa kömək edəcək.