Trabzon Kanuni Təhsil və Araşdırma Xəstəxanasının Uşaq şöbəsində 2,5 ildir mama olaraq çalışan Elif Yılmaz doğuş zamanı baş verə biləcək nəzarətsiz perine yırtıqlarının və yumşaq toxumaların zədələnməsinin qarşısını alan cihaz hazırlayıb. Mütəxəssis normal doğuşu asanlaşdıran patentləşdirdiyi cihazla 'Ar-Ge layihəsi' mükafatını əldə edib.

Azmedinfo.az xəstəxananın açıqlamasına istinadən yazır ki, doğuş tikişi olaraq da bilinən "epiziotomiya", doğuşun ikinci mərhələsində körpənin başı çıxmadan vaginal açılışın genişlənməsini təmin etmək, nəzarətsiz perineal yırtıqların qarşısını almaq və doğuşu asanlaşdırmaq üçün perineal bölgədə cərrahi kəsik olaraq təyin edilir.

Ümumdünya Səhiyyə Təşkilatı tövsiyə edir ki, normal doğuşda ən çox icra edilən cərrahi əməliyyatlardan biri olan "epiziotomiya" müntəzəm olaraq istifadə edilməməlidir. Doğuş və doğuşdan sonrakı dövrdə "epiziotomiya" tətbiqi perine ağrıları, ana ilə körpə arasındakı əlaqənin gecikməsi, ana südü ilə qidalanmanın gecikməsi və ananın sağalmasının gecikməsi kimi qadınların gündəlik həyatına mənfi təsir göstərir.

Hazırlanmış yeni aparat perineumun ön və arxa hissələrini bükür və masaj xüsusiyyətinə malikdir. Cihaz lazım olduqda daha böyük perine genişliyini təmin edir. Tərkibində silikon dioksid gel olan və isti tətbiq üçün səth toxumasına yerləşdirilmiş istilik tutma xüsusiyyətinə malik cihaz ana ilə körpə arasında gec bağlanma, gecikmiş əmizdirmə, ananın gec sağalması kimi mənfi təsirləri azaltmaq və ya aradan qaldırmaq, həmçinin travma nəticəsində yaranan sıx ağrı, infeksiya və qanaxmaların qarşısını almaq məqsədi daşıyır.

Elif Yılmaza 19 May Universiteti Tibb bacısı fakültəsinin 3-cü kurs tələbəsi ilə birlikdə hazırladığı və patentləşdirdiyi cihaza görə ötən gün Səhiyyə Nazirliyi "Ar-Ge" mükafatını təqdim edib.

Qeyd edək ki, Türkiyədə "Ar-Ge" mükafatı — elmi adı ilə Araşdırma və İnkişaf (Araştırma ve Geliştirme) sahəsində fəaliyyət göstərən müəssisə, şirkət, universitet və ya fərdlərə verilən bir mükafatdır. Bu mükafatlar, elmi-texnoloji yeniliklərin təşviqi, inovasiya qabiliyyətinin artırılması və rəqabət üstünlüyü qazandıran layihələrin dəstəklənməsi məqsədilə verilir.