Funksional endoskopik sinus cərrahiyyəsi bu halda ən effektiv üsullardandır - Otorinolarinqoloq - azmedinfo.az - Azərbaycan Tibbi İnformasiya və Səhiyyə Portalı

Funksional endoskopik sinus cərrahiyyəsi bu halda ən effektiv üsullardandır - Otorinolarinqoloq

14 Fevral 2025

1166

Funksional endoskopik sinus cərrahiyyəsi bu halda ən effektiv üsullardandır - Otorinolarinqoloq

Yeni Kilinikanın həkimi-otorinolarinqoloqu Nərmin Əyyubova bildirib ki, haymorit adətən infeksiyalar, allergik reaksiyalar, burun çəpərinin əyrilikləri, poliplər, müalicə olunmamış diş xəstəlikləri və ya uzun müddət davam edən soyuqdəymələr nəticəsində yaranır.

Azmedinfo.az xəbər verir ki, həkimin sözlərinə görə, burun boşluğunun daralması və ya haymor ciblərinin normal hava mübadiləsinin pozulması iltihabın inkişafına gətirib çıxara bilər.

Qeyd edib ki, haymorit zamanı xəstələr burun tıxanıqlığından, qalın burun axıntısından və üz nahiyəsində təzyiq və ağrılardan şikayətlənirlər. Bu ağrılar başın aşağı əyilməsi zamanı daha da güclənə bilər. Ağrı yanaqlarda, gözlərin ətrafında və bəzən yuxarı çənə dişlərində hiss oluna bilər. Xəstələrdə qoxu hissi zəifləyir və bəzi hallarda ümumi halsızlıq, baş ağrısı və hətta yüksək hərarət müşahidə olunur.

Haymoritin diaqnozu üçün ilkin olaraq fiziki müayinə və xəstənin şikayətlərinin qiymətləndirilməsi aparılır. Daha dəqiq nəticələr əldə etmək üçün rentgen və ya kompüter tomoqrafiyası (KT) tətbiq oluna bilər. Bu müayinələr vasitəsilə haymor ciblərindəki doluluq və ya iltihabın mövcudluğu müəyyən edilir.

Müalicə prosesində ilkin mərhələlərdə konservativ üsullara üstünlük verilir. Burun yuma məhlulları, iltihab əleyhinə dərmanlar və dekonjestant spreylər xəstəliyin simptomlarını yüngülləşdirir. Bakterial infeksiyalar zamanı antibiotiklər təyin edilir. Əgər xəstəlik xroniki hal alarsa və ya konservativ müalicə nəticə verməzsə, cərrahi müdaxilə tələb oluna bilər. Funksional endoskopik sinus cərrahiyyəsi (FESS) bu cür müdaxilələrdə ən effektiv üsullardan biridir.