Böyük Britaniyada aparılan bir araşdırma, xroniki ağrı və psixi sağlamlıq problemləri arasında gözlənilməz əlaqəni ortaya qoyub.

Azmedinfo.az "eClinicalMedicine" tibb jurnalına istinadən yazır ki, London Universitet Kollecinin (UCL) alimləri tərəfindən aparılan araşdırmaya görə, depressiya və tənhalıq kimi psixoloji problemlər fiziki ağrılar başlamazdan illər əvvəl özünü göstərir.

Araşdırmanın bir hissəsi olaraq, Böyük Britaniyada yaşı 50 və yuxarı olan 7300-dən çox insanın 21 illik sağlamlıq məlumatları təhlil edilib. Tapıntılar depressiya əlamətlərinin xroniki ağrı inkişaf etməzdən əvvəl əhəmiyyətli dərəcədə artdığını ortaya qoyub. Nəticələr "eClinicalMedicine" tibb jurnalında dərc edilib.

Tədqiqatçılar bel, diz, omba və ya ayaq ağrısı kimi xroniki ağrıları olanları digərlərindən ayıraraq fərdləri iki qrupa ayırıblar. Ağrı qrupunda olanlar, ağrı başlamazdan əvvəlki illərdə daha yüksək səviyyədə depressiya və tənhalıq hiss etdiklərini bildiriblər.

Tədqiqatçılar erkən mərhələdə verilən psixoloji dəstəyin və sosial yardımın ağrı riskini azalda biləcəyinə diqqət çəkərək, "Ağrıya yalnız bioloji baxımdan deyil, ruh sağlamlığı ilə birlikdə müraciət etmək lazımdır" deyib.

Tədqiqatda diqqəti çəkən başqa bir məqam təhsil və gəlir səviyyələrinin də müəyyənedici amillər olmasıdır. Təhsil və gəlir səviyyəsi aşağı olan şəxslərdə depressiya əlamətlərinin daha şiddətli olduğu aşkar edilib.

Elm adamları qeyd ediblər ki, depressiya əlamətləri zaman keçdikcə daha da pisləşir, ağrı ilk dəfə hiss olunduqda pik həddə çatır və daha sonra yüksək olaraq qalır və ağrı başlamazdan səkkiz il əvvələ qədər uzanır.

Oxşar tendensiya tənhalıq səviyyəsində də müşahidə olunub. Ağrı yaşamayan qrupda depressiya və tənhalıq səviyyəsi aşağı və sabit qalarkən, ağrı keçirənlərdə bu simptomların həm ağrıdan əvvəl, həm də ağrıdan sonra daha yüksək olduğu müşahidə edilib.

Alimlər hesab edirlər ki, psixi sağlamlığın qorunmasına proaktiv yanaşmalar, xüsusilə yaşlı insanlarda və əlverişsiz sosial-iqtisadi qruplarda uzunmüddətli ağrıların idarə olunması strategiyalarına inteqrasiya edilməlidir.