Madridin San-Karlos Klinikasının mütəxəssisləri androgen tipli alopesiya ilə mübarizə üçün innovativ müalicə üsulu təqdim ediblər.

Azmedinfo.az "New York Post" nəşrinin "Stem Cell Research and Therapy" jurnalına istinadən xəbər verir ki, dermatoloq Eduardo Lopes Branın başçılığı ilə aparılan araşdırmada saçların laboratoriya şəraitində (in vitro) yenidən yetişdirilməsi mümkün olub.

Təcrübələr zamanı siçanlardan alınmış piy toxumasından əldə olunan kök hüceyrələr adenosintrifosfat (ATP) molekulları ilə birlikdə istifadə olunub. Nəticədə, tədqiqata cəlb edilən bütün erkək siçanlarda yeni tük örtüyünün böyüməsi müşahidə edilib, onların 50 faizində isə bu artım daha intensiv olub. Dişi siçanlarda isə bu texnologiyanın effektivliyi 90 faizə çatıb.

Alimlər bu üsulun saç tökülməsi zamanı tük örtüyünün bərpasının mümkünlüyünü prinsipial olaraq sübut etdiyini qeyd edirlər. Lakin texnologiyanın insanlar üzərində tətbiqi üçün əlavə klinik sınaqlara ehtiyac var.