İsveçin Karolinska İnstitutunun tədqiqatçıları irsi karlığın müalicəsində inqilabi irəliləyiş əldə ediblər.

Azmedinfo.az xəbər verir ki, bu barədə təhsil müəssisəsinin saytında məlumat verilib.

İsveç alimləri tərəfindən hazırlanan bu innovativ gen terapiyası, anadangəlmə eşitmə pozğunluğu olan xəstələrdə eşitmənin bərpası üçün yüksək şanslar təqdim edir. Üstəlik, nəticə cəmi bir inyeksiya ilə bir neçə həftə ərzində əldə edilir.

Bu metodla karlığın müalicəsi, səsin qulaqdan beyinə ötürülməsi zəncirində əsas element olan otoferlin zülalının istehsalına cavabdeh olan OTOF genindəki mutasiyaların yaratdığı patologiyanı hədəfləyir. Terapiyanın mexanizmi zərərsiz bir virusun daxili qulağa yeridilməsinə əsaslanır ki, bu virus da genin sağlam bir surətini çatdırır.

Artıq müxtəlif yaşlarda olan on xəstənin iştirakı ilə kliniki sınaqlar keçirilib və bu sınaqlar ümidverici nəticələr göstərib. Prosedurdan bir ay sonra iştirakçıların əksəriyyəti eşitmədə ilkin yaxşılaşma müşahidə edib. Altı ay sonra isə bütün xəstələrdə əhəmiyyətli irəliləyiş qeydə alınıb: səsi qəbul etmə həddi orta hesabla 106 desibeldən 52 desibelə enib. Xüsusilə 5-8 yaşlı uşaqlarda təsirin daha qabarıq olduğu qeyd edilir.

Testlər müalicənin təhlükəsizliyini təsdiqləyib və ciddi əlavə təsirlər aşkar etməyib. Tədqiqat qrupu müalicə metodlarının inkişafı üzərində işləməyə davam edir.