Çinin cənubunda yerləşən Quanqdonq əyalətinin Foşan şəhərində, əsas daşıyıcıları ağcaqanadlar olan çikunqunya virusuna yoluxanların sayı son iki həftə ərzində 4 014 nəfərə çatıb.

Azmedinfo.az "Global times"a istinadlən yazır ki, çikunqunya virusuna yoluxma hallarında Çinin cənub əyalətlərində artım müşahidə olunur. Rəsmilər bildiriblər ki, yoluxmaların təxminən 90 faizi Foşan şəhərinin Şunde bölgəsində qeydə alınıb və xəstələr xəstəxanalarda müalicə alırlar.

Ümumdünya Səhiyyə Təşkilatının məlumatına əsasən, ağcaqanad sancması ilə yayılan çikunqunya virusu qızdırma və oynaq ağrıları ilə müşayiət olunur.

Nadir hallarda ölümə səbəb olan bu virusun müalicəsi üçün hazırda təsdiqlənmiş iki peyvənd mövcuddur.

Ötən həftə  ÜST ekspertləri xəbərdarlıq edərək bildirdilər ki, çikunqunya virusunun yayılması artıq 119 ölkə və regionda qeydə alınıb. Virus Çinə daxil olduqdan sonra əsas daşıyıcı olan Aedes cinsinə aid ağcaqanadların mövcudluğu yerli yoluxma hallarının və kiçikmiqyaslı epidemiyaların yaranmasına şərait yaradıb.

Əlverişli iqlim şəraiti və spesifik virus ştamı bu ilki epidemiyanın qeyri-adi dərəcədə geniş miqyas almasına səbəb olub. İsti və rütubətli hava ağcaqanadların sayının artmasına gətirib çıxarıb. Həmçinin, idxal olunmuş virus ştamı — Hind Okeanı mənşəli ştam — Aedes ağcaqanadları vasitəsilə yayılmaq baxımından xüsusilə təsirlidir.