Ümumdünya Səhiyyə Təşkilatı (ÜST) iyun ayında dünyada meymun çiçəyi virusuna 4798 yoluxma faktının qeydə alınmasına baxmayaraq, xəstəliyin azalma tendensiyasının davam etdiyini bildirərək, bütün tədbirlərə, xüsusilə də məqsədyönlü peyvəndlərə ciddi şəkildə əməl edilməli olduğu barədə xəbərdarlıq edib.

Azmedinfo.az xəbər verir ki, ÜST virusa yoluxmuş insanları mümkün qədər evdə təcrid etməyə çağırır və səpgilər tamamilə yox olana qədər maskalardan istifadə etməyi tövsiyə edir. Dərinin quru və açıq saxlanması, əllərin tez-tez dezinfeksiya olunması və başqaları ilə təmasdan çəkinmək vacibdir.

Meymunçiçəyinə qarşı peyvənd vurulması işlərinə Mərkəzi Afrika Respublikası, Konqo Demokratik Respublikası, Liberiya, Nigeriya, Ruanda, Sierra Leone, Cənubi Afrika və Uqandada başlanılıb.

ÜST-nin mətbuat katibi Marqaret Harrisin sözlərinə görə, bu virusin əvvəlkindən daha sürətlə yayılması və ölüm nisbətinin daha yüksək olması, xəstəliyin xüsusilə uşaqlar və immun sistemi zəif insanlar üçün daha təhlükəli olması narahatlıq doğurur. O qeyd edib ki, hazırda xüsusi müalicə yoxdur, lakin bu virusa yoluxmuş xəstələr üçün dəstəkləyici müalicə üsullarından istifadə olunur.

Meymunçiçəyi adətən 2-4 həftə ərzində öz-özünə yox olur, lakin immuniteti zəif olan insanlarda və kiçik uşaqlarda xəstəlik ağır keçə bilər.