Ümumdünya Səhiyyə Təşkilatı (ÜST) bildirir ki, döş xərçənginin erkən mərhələdə aşkarlanması müalicənin uğurla nəticələnmə ehtimalını əhəmiyyətli dərəcədə artırır. Bu səbəbdən hər bir qadının öz sağlamlığına diqqət yetirməsi, profilaktik müayinələrdən keçməsi və bədənində baş verən dəyişikliklərə qarşı ayıq olması vacibdir.

Azmedinfo.az ÜST-ün tövsiyələırini izləyiciləri iləpaylaşır:

Özünü mütəmadi yoxlamaq – Ayda bir dəfə, xüsusən menstruasiya bitdikdən bir neçə gün sonra döşlərinizi diqqətlə yoxlayın.

Şübhəli əlamətlərə diqqət – Döşdə və ya qoltuqaltında sərtlik, şişkinlik, dəridə çəkilmə, qızartı, döş ucundan qanlı və ya şəffaf axıntı, forma və ölçüdə dəyişikliklər müşahidə olunarsa, dərhal həkimə müraciət edin.

Müntəzəm tibbi müayinələr – 40 yaşdan yuxarı qadınlar ildə bir dəfə mammoqrafiya müayinəsindən keçməlidir. Risk qrupuna aid qadınlarda bu, daha erkən yaşlarda başlana bilər.

Sağlam həyat tərzi – Balanslı qidalanma, fiziki aktivlik, siqaretdən imtina və alkoqolun məhdudlaşdırılması xərçəng riskini azalda bilər.

Ailə anamnezini bilmək – Əgər ailədə döş və ya yumurtalıq xərçəngi halları olubsa, həkiminizlə genetik risklər barədə məsləhətləşin.

ÜST xəbərdarlıq edir ki, döş xərçəngi qadınlarda ən çox rast gəlinən xərçəng növlərindən biridir, lakin vaxtında aşkarlanarsa, sağalma şansı çox yüksəkdir. Hər bir qadın öz sağlamlığının ilk növbədə öz əlində olduğunu unutmamalıdır.