Ümumdünya Səhiyyə Təşkilatının (ÜST) məlumatına görə, qida rasionumuzda həddindən artıq duz və şəkərin istifadəsi ciddi və bəzən ölümcül nəticələrə gətirib çıxara bilər. Bu maddələrin normadan artıq qəbulu yüksək qan təzyiqi, ürək-damar xəstəlikləri, iflic, tip 2 şəkərli diabet və hətta bəzi xərçəng növlərinin yaranması riskini əhəmiyyətli dərəcədə artırır.

Azmedinfo.az xəbər verir ki, duz orqanizmdə su-duz balansının pozulmasına səbəb olmaqla yanaşı, qan damarlarına təzyiqi artırır və bu da ürək fəaliyyətinə mənfi təsir edir. Şəkər isə artıq çəki, insulin müqaviməti və mədəaltı vəzinin fəaliyyətində pozulmalara səbəb olur. Bu proseslərin uzunmüddətli təsiri isə ciddi xəstəliklərlə nəticələnə bilər.

ÜST gündəlik rasionda bu riskləri azaltmaq üçün bir sıra tövsiyələr verir. Ən başlıcası – hər gün ən azı 5 porsiya (təxminən 400 qram) meyvə və tərəvəz istehlak etməkdir. Bu qidalar orqanizmi antioksidantlar, vitaminlər, minerallar və liflərlə təmin edərək, xəstəliklərə qarşı qoruyucu rol oynayır. Eyni zamanda, kaliumla zəngin olan tərəvəzlər qan təzyiqinin tənzimlənməsinə kömək edir.

Sağlam qalmaq və həyat keyfiyyətini qorumaq üçün duz və şəkərin miqdarına ciddi nəzarət edin, təbii qidalara üstünlük verin və qan təzyiqinizi mütəmadi olaraq yoxlayın. Unutmayın, profilaktika – müalicədən daha asan və daha təsirlidir!