Əl gigiyenası infeksiyaların ötürülməsinin qarşısının alınmasında əsas profilaktik tədbirdir

Əl gigiyenası infeksiyaların qarşısının alınmasında ən təsirli və eyni zamanda ən sadə profilaktik vasitədir. Xüsusilə səhiyyə müəssisələrində mikroorqanizmlərin əllər vasitəsilə ötürülməsi ciddi nozokomial infeksiyalara səbəb ola bilər. Bu baxımdan, gigiyenik əl yuma və ya antiseptiklə təmizləmə, pasiyent təhlükəsizliyinin qorunmasında vacib rola malikdir.

Azmedinfo.az tövsiyə olunan gigiyenik tədbirləri izləyicikəri ilə paylaşır:

- Əllər sabun və su ilə azı 20 saniyə yuyulmalıdır. Əgər əl görünən şəkildə çirkli deyilsə, spirt əsaslı (azı 60% spirt tərkibli) antiseptik məhluldan istifadə oluna bilər.

- Əl gigiyenası aşağıdakı hallarda xüsusilə vacibdir:

Pasiyentlə təmasdan əvvəl və sonra

Tibb alətlərinə və ya çirklənmiş səthlərə toxunduqdan sonra

Bioloji mayelərlə təmasdan sonra

Tənəffüs yolu simptomları olan şəxslərlə ünsiyyətdən sonra

Qida ilə işləməzdən əvvəl

Tibbi personal əl gigiyenası üzrə beynəlxalq protokollara (məsələn, WHO-nun “Beş Əsas An” konsepsiyasına) uyğun təlimatlandırılmalı və nəzarət altında saxlanmalıdır.

Əl gigiyenasına riayət olunmaması bir sıra yoluxucu xəstəliklərin – COVID-19, qrip, rotavirus, enterovirus və bağırsaq infeksiyalarının yayılmasına səbəb ola bilər.

Əl gigiyenası yalnız fərdi qorunma tədbiri deyil, həm də ictimai sağlamlığın qorunması baxımından strateji əhəmiyyətə malikdir. Səhiyyə işçiləri və cəmiyyətin bütün üzvləri gigiyenik davranışları gündəlik həyatın ayrılmaz tərkib hissəsinə çevirməlidir.