Uzun illərdir siqaret filtrinin varlığı insanlara bir illüziya – yalançı təhlükəsizlik hissi aşılayır. Sanki həmin nazik süngər parçası siqaretin ölümcül təsirini azalda bilərmiş kimi təqdim olunur. Bu, tütün sənayesinin düşünülmüş və məqsədli marketinq hiyləsidir: filtrlər siqaretin daha az zərərli görünməsi üçün istifadə olunan maskadır.

Azmedinfo.az ÜST-ə istinadən filtrlərin siqareti təhlükəsiz göstərən aldadıcı vasitə olduğuna dair maarifləndirici yazını təqdim edir:

Həqiqət isə daha qəddardır: filtrli və ya filtrsiz – siqaret öldürür. Filtrlər yalnız tütünün təhlükəsini kamuflyaj edir, lakin onu aradan qaldırmır. Əksinə, filtrlər siqaret çəkməyə başlamağı asanlaşdırır, çünki duman daha "yumşaq" hiss edilir. Bu "rahatlıq", əslində, aldanışdır. Nəticədə, siqareti buraxmaq da bir o qədər çətinləşir.

Daha qorxulusu isə odur ki, filtrlərin yaranmasından sonra ağciyər xərçənginin daha aqressiv formalarının artdığı müşahidə olunub. Çünki filtr siqaret çəkəni daha dərindən nəfəs almağa vadar edir və zərərli hissəciklər ağciyərin daha dərin qatlarına nüfuz edir.

Bu gün insanlığın qarşısında vicdanla veriləcək bir sual dayanır: Tütün sənayesinin yalanına nə qədər daha susacağıq? Əgər siqaret onsuz da ölüm gətirirsə, niyə onun “təhlükəsiz” forması barədə miflərə aldanırıq?

Gəlin bu saxta təhlükəsizlik hissəsinə son qoyaq. Filtrlər çıxış yolu deyil – onlar problemin bir parçasıdır. İndi susmaq yox, danışmaq zamanıdır. Gəlin müraciəti üzə çıxaraq və filtrlərə qadağa qoymağa çağırış edək. Bu, yalnız sağlamlıq deyil, həm də vicdan məsələsidir.