Uşaqlıq boynu xərçəngi qadınlar arasında geniş yayılmış, lakin erkən aşkarlandıqda qarşısı alına bilən və uğurla müalicə olunan xərçəng növlərindən biridir.

Azmedinfo.az Ümumdünya Səhiyyə Təşkilatının (ÜST) məlumatına görə, bu xərçəng növü vaxtında diaqnoz və düzgün müdaxilə ilə tam qarşısı alına bilən azsaylı xərçəng formalarındandır.

Uşaqlıq boynunda baş verən hüceyrə dəyişiklikləri illərlə simptom vermədən inkişaf edə bilər. Bu dəyişikliklərin vaxtında aşkarlanması üçün ÜST tərəfindən müntəzəm skrininq proqramları – o cümlədən Pap-test və HPV testi – tövsiyə edilir. Müntəzəm müayinələr vasitəsilə bu dəyişikliklər erkən mərhələdə müəyyən edilə bilər və xəstəliyin xərçəngə çevrilməsinin qarşısı alınar.

Xüsusilə 25–65 yaş arası qadınlara müntəzəm ginekoloji müayinələrdən keçmək tövsiyə olunur. Bundan əlavə, HPV (insan papilloma virusu) infeksiyasına qarşı peyvənd də ÜST tərəfindən təsdiqlənmiş və effektiv qoruyucu tədbir hesab olunur.

Unutmayın!

• ÜST: uşaqlıq boynu xərçəngi vaxtında aşkarlanarsa, 90%-ə qədər hallarda tam müalicə oluna bilər
• Profilaktika və maarifləndirmə – sağlam gələcəyin əsaslarıdır