Ümumdünya Səhiyyə Təşkilatı (ÜST) tütün istifadəsinin qlobal miqyasda ildə yeddi milyondan çox insanın ölümünə səbəb olduğunu bildirərək, ölkələri bu bəlanın qarşısını almaq üçün daha ciddi addımlar atmağa çağırıb. ÜST-ün iyunun 23-də yayımladığı “Qlobal tütün epidemiyası – 2025” adlı hesabatında bu sahədə mövcud vəziyyət və gələcək tövsiyələr öz əksini tapıb.

Azmedinfo.az xəbər verir ki, ÜST hesabatında tütünə qarşı mübarizədə altı əsas siyasət tədbirinin vacibliyi vurğulanır. 2007-ci ildən bəri 155 ölkə bu istiqamətdə ən azı bir tədbir həyata keçirib ki, nəticədə dünya əhalisinin təxminən dörddə üçü, yəni 6.1 milyarddan çox insan bundan faydalanıb. Lakin təşkilat bu sahədə hələ də böyük boşluqların olduğunu qeyd edir.

Tütün istifadəsinin qarşısını almaq üçün ÜST-ün əsas tövsiyələri aşağıdakılardır:

Tütün istehlakı və qarşısının alınması siyasətlərinin daimi monitorinqi.

İnsanları tütün tüstüsündən qorumaq üçün tütünsüz hava qanunvericiliyinin tətbiqi.

Tütündən imtina etmək istəyənlərə dəstək və kömək proqramlarının təklif edilməsi.

Siqaret qablaşdırmaları üzərində və kütləvi informasiya vasitələrində tütünün təhlükələri barədə açıq xəbərdarlıqların edilməsi.

Tütün məmulatlarının reklamına, təşviqinə və sponsorluğuna tam qadağaların tətbiqi.

Tütün vergilərinin əhəmiyyətli dərəcədə artırılması.

ÜST-ün bu çağırışı tütün epidemiyası ilə mübarizədə qlobal səylərin gücləndirilməsinin vacibliyini bir daha önə çəkir.